حياتنا

حكلمكم انهرده عن حاجة لطيفة جدا في حياتي .. أصحاب عرفتهم من منتدى على النت.. ودلوقتي بقينا كلنا اخوات وصحبة جميلة .. في البداية أنا كنت مرعوبة من فكرة اني حتى اكلم حد معرفوش ع الماسنجر .. لكن لما دخلت المنتدى ده ولقيت الناس هناك كأنهم عيلة وكلهم عارفين بعض .. اتطمنت إلى حد ما ..مش فاكرة الموضوع بدأ ازاي ولا مين أول واحدة عرفتها لكن حكلمكم عن الشئ المميز لكل حد فيهم:

أولا الأكثر شعبية : ورداية/ دودو / هدى : وخلينا نقول ورداية .. هي اللي كانت بتنظم لنا اللقاءات و كانت بتعمل جو تحفة في المنتدى كله .. ورداية فنانة حساسة .. وتلقائية .. مصممة مواقع وحاجات كده أنا مفهمهاش في الجرافيكس .. و فنانة حُلي كمان - إعلان مجانا أهه أي خدمة - ورداية من الناس اللي مشاعرها تبان عليها .. فانفعالها بيتنقل كمان للي قدامها سواءا فرح أو حزن أو جنون أو حماس وده أجمل انفعال بتكون فيه هدى .. وهي حد متعاون جدا وصاحب صاحبه وبنوتة جدعة أوي .. وياما سهرنا ع التليفون نحكّي .. وهي كمان مرنة في الموازنة بين الواقع والمأمول ( أيه الكلام الجامد ده ).. أكتر ما ينطبق عليها : مبدعة

أما حبيبة قلبي الغائبة هبة / بوتّا بتشديد التاء : أولا وحشتني جدا لأنها دلوقتي في الكويت .. بوتا من أطيب الناس اللي ممكن تصادفهم في حياتك .. وصديقة لطيفة أوي .. أنا فاكرة إنها أول مرة اتقابلنا جابت لي دبدوب هدية ( بطاطا ) و ياما اتكلمنا بالساعات في التليفون قبل ما نشوف بعض .. وذكرياتنا الجميلة مع مطعم مؤمن اللي عند باب تجارة جامعة القاهرة لأنها كانت بتاخد دبلومة في كليتها .. وهي بالمناسبة اقتصاد وعلوم سياسية .. و بوتا من الناس الخجولة كمان فالحكم عليها بيكون من المرات المتتالية مش أول مرة .. وكفاية كده بقى أحسن حعيط .. هبة : والله وحشتيني جداااااااااااااا

دولسي / داليا : بنوتة اسكندرانية .. أكتر وصف ينطبق عليها انها بنوتة .. رقيقة .. وأديبة .. وهي آداب إنجليش و ذواقة جدا للأدب .. داليا شفتها مرتين مرة في مصر ومرة في اسكندرية وربنا يعلم مكانتها عندي .. هي من الناس اللي باحبهم جدا .. ومن الناس الطيبين جدااااااااااااااا

نَروش / مروة : أكتر حد مجنون ممكن تصادفه .. تركيبة سكر جدا .. لما بتكون متضايقة بتدخل على موقع مصراوي تقرا نكت .. هي حد عصبي شوية بس زي العسل .. مروة منتقبة وملتزمة وعايشة حياتها أوي كمان .. لما باشوفها باحس بالتفاؤل ويدب فيا النشاط

هورس / هبة : واضح جدا من الإسم ولعها بالخيل طبعا .. هورس بتموت في الشعر العامي ومن عشاق رباعيات جاهين .. بنوتة واقعية ودماغها شغالة .. من رأيي إنه البنت دي لو عملت بيزنس حتنجح جدا .. مجنونة نوعا ما .. مؤخرا بدأنا نفهم بعض

سمارت/ آلاء : أجمل ضحكة ممكن تشوفها في حياتك ..حد طيوب جدا و دمه شربات .. مجرد ما بتيجي على بالي باحس بالانشكاح .. منساش يوم ما جات لي المكتب في الشغل القديم ومعاها بوكيه ورد .. كانت مفاجأة تحفة بالنسبة لي .. بتفكرني بالكارتون .. بس في الفترة الأخيرة لاحظت إنها بدأت الحياة تاخدها للواقعية .. أرجوكي إوعي تتاخدي عشان تفضلي مرحة دايما .

مي الغروري : من أكتر الناس المثقفين في المنتدى .. مي شاعرة.. صيدلانيه .. ومي ليها وجهة نظر شخصية في الحياة .. ليها فلسفتها في كل حاجة .. كمان مي من أجمل البنات اللي شوفتهم بيسوقوا عربيات .. سواقتها تحفة .. ومن أشيك الناس في اللبس كمان .. مي من العاقلين

سحابة / هدى : حد مجنون جدا .. دماااااااااغ .. وبتفهم اللي قدامها .. متفتح .. صحبتها بشكل عام لطيفة .. هي كمان شاعرة فصحى عمودية .. وبتكتب يوميات ومذكرات بأسلوب عامي ساخر .. هدى كانت مقيمة في السعودية وجت مصر مؤخرا .. وجت معايا مرة جماعة آدم كمان .. تخصصها إسلامي .. و في الإعلام

شجن / الاسم الحقيقي أعتقد متحبش يتعرف : صيدلانيه عربية مقيمة بالسويد .. من أكتر الناس اللي كانوا بيقولوا كلام عاقل فيما قل ودل لما كنت باستشيرها في أي حاجة .. ومن أكتر الناس اللي عندهم رضا في حياتهم .. وهي شخصية عمليه .. ونفسي أشوفها جدا

كيكي / آية ( أخت آلاء ) : عاقلة في آرائها و بتفكرني بشبابي :) هي في أولى جامعة حاسبات ومعلومات .. حد سكر جدا .. أعتقد أنها حتكون حد ناجح ومعندوش عقد وعلاقاتها ناجحة وبالذات عاطفيا

حبيبة / مريم : شفتها مرة واحدة و اتكلمنا ع التليفون كذا مرة .. هي حد متحفظ .. عاطفي .. دماغ برضه .. أعتقد انها لسة بتدوّر على أهداف تعيش عشانها وبتتغير .. وأعتقد برضه يا مريم حتستقري بعد فترة بحث

ضي النهار : معرفتي بيها بسيطة جدا لأني أول مادخلت المنتدى كانت بتحضر لجوازها .. هي حد عاقل ومجنون و لذيذ وكان بيقولوا انه موضوعاتنا متشابهة وهي كانت أغلبها اجتماعية .. وكانت مأثرة في الناس جامد

فراولة/ منى : شفتها مرة واحدة .. عشان كده معرفش عنها غير حاجات سطحية .. حسيت انها من أكتر الناس المهتمين بشكلهم .. هي برضه بنوتة مرحة .. وهي أكتر حد بيرن لي

زينة / هبة : شفتها مرة أو اتنين .. بنوتة متدينة و هادية وواثقة ف نفسها

وباقي الناس تقريبا مليش علاقات مقربة بيهم

كنت عايزة أذكر كمان : عمو نبيل .. أو جدو نبيل زي ما كنا بنقول له .. وهو كان راجل ممتاز ربنا يرحمه يا رب .. ومن أكتر الناس اللي قدموا مساعدات للي في المنتدى .. ربنا يرحمه يا رب ويجعل مثواه الجنة

..........

بجد المنتدى ده " مجانين" أثر في حياتي جدا .. والجروب ده كان ومازال صحبة جميلة .. أكتر بكتير من معرفة منتدى .. لأ دول صحاب بجد

ربنا يكرمكم جميعا يا رب