مش كل إبداع فزلكة

كنت هناك ما بين العصر و المغرب .. و ع الترابيزة فنجان القهوة اللي استمد جماله من هوا البحر .. و القعدة العربي و المكان الخوص .. مكنتش شايفة حد ع البلاج .. لقيت الكافتيريا مشغلين شريط كاظم :" يوميات رجل مهزوم " و الصوت كان عالي بشكل يحتويك من غير ما يزعجك .. طبعا ماهو كاظم .. ولما وصل لغنوة " إضحك " وقف على مسرح الرمل و وراه البحر بجمال و روعة قبل المغرب بشوية كتير فاضي من البشر مليان بشقاوة حبات المية الباردة بلونها اللبني و الأبيض و هو بالبدلة السودا الطويلة بتاعته و قدامه المايك و معاه فرقته الخاصة بالطبول عشان إضحك .. و ابتسم ابتسامته الجميلة الهادية و رفع حواجبه و بدأت عنيه تلمع بشقاوة الكلمات و هو بيقول :"إضحك و شوفنا سنانك صفين لولي و ليش مخبى .. يستاهل حسنك و جمالك وين من العزال نهربه " .. كنت مبسوطة أوي و انا باسمعه بكل بساطته و كبرياؤه و تواضعه .. قد أيه بيخلي الحياه حلوه .. و عذبه .. و ونس حقيقي و لقتني باروح معاه دنيا تانية لما قال :" تقول انسى " بكل إحساس الشجن .. و فرقة الطبول اختفت بس الميك فضل موجود .. وفضلت اسمعه بعدما خلص فنجان القهوة .. استغربت إنه المسرح فاضي .. ولا يمكن أنا مشفتش غير إحساس كاظم و تعبيراته .. انبسطت أوي أوي و وعدت نفسي إني حاسمعه تاني في نفس المكان بس يمكن تكون الأغاني مختلفة أو يشاركني الاستماع حد من جمهوره .. من غير ما الدنيا تليل ولا ازعل انه القهوة خلصت و زي المرة دي اكون ناسية كل اللي مش وقته