بسين في ميدان التحرير !!

الصيف الماضي .. أيام الحرارة الشديدة جدا " اللي مش طيلاها دلوقتي " .. كنت نازلة رايحة مشوار كئيب في وقت الذروة يعني ع الساعة تلاتة أو اتنين و نص كده .. واو .. راكبة ميني باص على النظام القديم أبو الكراسي مش منجدة .. و بخمسين قرش .. بيعدي على ميدان التحرير .. و ماقولكوش بقى قد إيه الشوارع بتكون فااااااااااااااااااضية الوقت ده .. و الدنيا مش زحمة خالص .. و ممكن تركب و تقعد بمنتهى اليسر .. يعني لو عندك موعد الساعة ستة مثلا تكون مستعد من الساعة أربعة على أقصى تقدير !! المهم

لأني راكبة من أول الخط فالحمد لله كنت قاعدة .. و عشان أنا غاوية تعب فباحب اقعد جنب الشباك حتى ف عز الحر .. قبل مبنى الإذاعة و التليفزيون كده بشوية .. بين اتجاهيّ الطريق الرايح و الجاي .. أو اللي بيمثلو كده لأن الكل واقف أصلا نفس وقفة الدفع لخزينة الكلية.. لقيت يافطة إعلان .. عليها إيه .. خير اللهم اجعله خير

بنوتة رقيقة كده .. بسكويتة بسلوفان .. بتغطس وسط حمام سباحة بارد و منعش .. شعرها مبتل و لا يظهر منها سوى نصف رأسها و مقدم شعرها .. و باقي رأسها في المياة الرائقة .. و الجملة اللي تحتها كده حاجة زي ليه تستمتع أقل لما ممكن تستمتع أكتر .. و كلام كده يشبه لرائحة ساندوتش تيك أواي فيه الصنف اللي بتحبه و ساخن و معاه سلطة كول سلو من مؤمن و كاتشب و بطاطس .. و انت مخلّص آخر مليم ف جيبك الأبيض كالصيني المتلقح ف النيش

و الله يا إخواني الأعزاء و مالكوش عليا يمين .. كنت هطق م الغيظ و أحاول جاهدة أن أوهم نفسي بأن القطرات الغلسة من العرق التي لا تمحوها شركة فلورا بأكملها .. قطرات منعشة من المياة الباردة في حمام سباحة خاص بالفيلا بتاعتي أو شالية القرية السياحية في الساحل الشمالي " يللا خليها علينا " .. و من حسن الحظ أن الميني باص ظل واقفا ما يزيد على النصف ساعة بجانب هذه اليافطة منتظرا تحرك جيش السيارات الجرار من أمامه .. و كلاكسات و زفرات يأس .. و الناس مفرهدة كأن ضغطهم صفر .. ده غير الزهق بقى كأنك بتغسل طاسة تحمير و آثار المياة لا تمحو آثار الزيت أو السمن كما تفضله .. ما اقولكوش جو منعش ع الاخر

دارت في مخي - بعدما صدقت أنها قطرات عرق و ليست آثار البسين - أفكار كثيرة لم تحضرني بهذا العمق من قبل .. لماذا في هذه النقطة الساخنة .. بين جانبيّ الطريق .. و بهذا الحجم الذي يراه من يرتدي لينسز ملونة :) و نظره على قده .. و بهذا القدر من الجذب !!؟

ربما بل مؤكد يمر من هذا المكان ناس في آي بي مش ف المستوى الاجتماعي .. لا في المستوى المادي .. فهو مكان واو .. و ع النيل .. لكن هذا المكان لم يتخلص بعد من المواصلات الدرجة سابعة كالميني باصات و الميكروباصات و ربما الأتوبيسات .. و ترى على محطاته ملايين من البشر المنتظرين أتوبيس معين لتوفير أجرة مواصلتين .. و هم خارجين من عملهم و بأيديهم شنط بلاستيك فيها حاجات للبيت أو للغدا ضروريات الحياة م الاخر .. و ظلال الأشجار الوارفة لا تقوى نسماته على الحر الشديد.. و الأبناء لا يرحمون شقائهم المغلف بالمحبة الصادقة و بدون أغراض .. و فيمن هم تحت خط الفقر كما يسمونهم .. و ماذا لو قضوا يوما في تلك القرية المنعشة !؟؟ .. و ما شعور من يرى هذا الإعلان و هو حتى لا يملك مصاريف المصيف السنويّ !!؟

..

شعرت .. ما معنى الفرق بين الطبقات .. و ما إحساس من يراك تطعم طعاما تفوح روائحه .. حتى ربما كان ساندوتش بطاطس بـ 75 قرش لا يمتلك ثمنه و يكتفي بالبحث عن الطعام كما تبحث القطط في الشنط الملقاة في صناديق المهملات .. أو بجانبها

قدّرت نصيحة أبي رحمه الله يوما ما بألا أطعم ما هو شهي ّ المذاق إلا في بيتي .. و أن أداريه عن العيون في الطريق .. كم كان رجلا عظيما !1

تذكرت هذا الموقف ربما لأسباب غريبة .. سمعت دكتور عادل عبد العال ذات مرة في ندوة عن الطب البديل ينصح بعدم التعرض لمثيرات الأعصاب و محرقات الدم من المواقف و الأحداث السياسية و غيرها .. و الموضوعات الخلافية الشائكة .. و بالفعل سمعت نصيحته الآن عندما قرأت عنوانا أغاظني في أحد المنتديات .. و بمنتهى الهدوء لم أقرأه و اعتبرته انتصارا على ذاتي .. و لكن كيف نستطيع تجنب مثيرات الأعصاب و قد أصبحت تجري في دمائنا

الحمد لله على كل نعمة نحن بها أغنياء .. الحمد لله .. لكن هل لو كنت صاحب شركة انتعاشكو للقرى السياحية كنت ستقوى على حمل ذنوب كل من يرى إعلانك .. و قد أوصانا الرسول صلى الله عليه و سلم بالإعطاء للجار من الطعام المشوى لأنه شم رائحته ؟؟

ــــــــــــــ

ملحوظة بره الموضوع لقراء مدونتي الأعزاء : مظبطاكم اخر تظبيط أهه .. البوست السابق مثلج و البوست ده بيغلي .. ربنا يستر و الواحد ميطقش :)