يمكن كمان ليها دلالات نفسية .. يعني مثلا الأماكن والشوارع بتفكرني بالحاجات والمشاعر والناس والأحداث .. عادي يعني .. بس فيه حاجة باستغربها حبة .. لما باكون مع حد قريب مني بحب أقعد في مكان مغلق .. وعلى ترابيزة في الركن .. والمكان يكون ألوانه داكنة .. كأنه بيحافظ على الأسرار ومش بيخلي دفء الأحاسيس يتسرب برا الصدور وبيمسح الدموع لو نزلت .. غير بقى لو مع ناس كتير باحب اقعد في مكان مفتوح .. وفاتح وواسع .. وعلى ترابيزة في النص .. أصلي باحب النجومية :) .. وباضحك بصوت عالي .. وممكن اتحرك .. وباكون مبسوطة برضه .. لكن بقى لما الحكايات بتقلب نكد .. باكره كل الأماكن .. حتى لو مكان عديت عليه أو دخلته اسأل عن حاجة .. ولا محل بصيت على فاترينته .. مبتروحش مني التفاصيل .. حاجة كمان بتحصلي إني مش بحفظ كمان الأماكن بسهولة .. لازم اروح كتير ولو رحت من طريق تاني باتوه .. عشان كده مبحبش الأماكن .. بتحط على ذكرياتي السيئة خيوط عنكبوت بس قوية جدا .. أما لما باكون مع ربنا في بيت من بيوته .. بحب الأماكن الواسعة جدا وآخد منها ركن يبقى ليا يكون جنب شباك الدنيا .. ده المكان الوحيد اللي بحب أروحه لوحدي .. عايزة أعمل ركن في بيتي بنفس تفاصيل ديكور سلنترو وألوانه .. وعايزة أعمل في روحي ركن زيه .. عشان أحس بالأمان .. وإن الدنيا في فنجان قهوة أنا اللي ماسكة ودنه وبابوسه وأطبطب عليه وأخلصه كله وأدي منه للي بحبه من غير ما يقع على هدومي.
2 comments:
الى الدماغ العالية قوي ايمان ..
الي جميع شلالات العالم ..مش عطر بس لالالا ..ده عطر وأدب وكمان أدب من التاني اللي بيقترن بالذوق ..وحلاوة اسلوب ايه يابنتي مش حرام عليكي اللي عملتيه فيا هذه الليلة ؟؟؟ظ
جئت امر على مدونتك لأعرف من هذه التي اخترتها من اوائل الناس اللي اعلق عندهم في احتفالية التدوين ..
وما أن دخلت حتى شددتيني الى متاهات من الإبداع..وانا مش عاملة حسابي ومش جايبة معايا المايوه ...وعنك وفضلت اسبح واغوص حتى أذّن الفجر وانا عايزة اجيب آخرك مش عارفة ..فين..وفييييييييييين لما لقيتك مبتدية يوم 11 اكتوبر 2006 ..عارفة ده يمثلي ايه ؟؟؟عيد ميلادي ولو طبعاً اعترتيني مولودة في نفس السنة كمان مايضرش ....الطفلة المعجزةالمهم انا مش حاسيبك مش بمعنى اني اعلق عندك بس لا انا حاعملك اعلان عن مدونتك في
هذا الشهر الفضيل وحاخلي الكل يدخلوا عندكودلوقتي مع شوية تواريخ من اللي عجبتني البوستات اللي فيهم
13-4-2009
28-4-2009
20-11-2009
18-12-2009
6-1-2010
14-11-2010
28-11-2010
24-1-2008
9-6-2008
11-10-2006
اسعدتيني يا إيمان وانا مستنياكي عندي في مدونتي المتواضعة :اتمشى بين ضلوعي
http://etmashabaindolo3y.blogspot.com
تحياتي والى اللقاء
انا بيجينى نفس احساسك بالاماكن على فكره
عجبنى الكلام :)
Post a Comment