عايش بتعصر ضحكتك لجل إن تبان حقيقية من جوّاك
تضحك بصوت عالي أوي على شئ عبيط
وتتجاهل فتات الفرح اللي انكسر على ضهرك
وساب شقوق فـ عمودك الفقري
محتاجة عمر عشان تموت
اضحك كمان
زعق
ارقص
غنى بعلو الصوت دموع
الروح وتر موجوع تراخى من خيبة الأمل
في كل مرة يروح وييجي مع الأمل
ياخده وتر منصوب .. يرجع أسير خيبة الأمل
دندن كأنك جوه عشقك ما اتنسيت
ونام كأن الحلم بيت
واحلم بملو هواك ..
يا عم ما الحلم ببلاش
عيش مرة زي ما كله عاش
طنّش مشاعرك وانتهك طاقة الحنين
قلبك خلاص مبقاش سند للموجوعين
ضهرك كبر ع الاعتدال
وقضيتك باقت عروسة مهكعة
مش حمل زقّة من السعادة
أجّل مراسم شكوتك
القاضي مشغول مش فاضيلك..
إيمان الميهي
No comments:
Post a Comment