وَحْشَة "فضفضة"

من كتير مسمعتش موسيقى كلاسيك :) بس مبسوطة أديني باسمع شوبان مع كوباية النسكافيه الجامدة
يا سلام لو نفضل جوه الأيام الحلوة وتتمط اللحظات الخاصة
وحشتني فطيرة كافتيريا كليه علوم
وحشتني محاضرات الفلسفة دكتور إبراهيم يسري و الأدب دكتور أحمد مجاهد والراديو أستاذ مرسي عبدالعليم
وحشتني قراية الأدب
وحشني الليل اللي مخاصمني من فترة
وكاظم الساااهر
وحشتني كل الحاجات اللي كانت بتنكشني زمان
وحشتني الأفلام اللي بحبها اللي مبقتش بتتعرض دلوقتي
وحشوني الناس كتير .. بجد :)
لما بنكبر الحياة بتبدأ تخلينا مسئولين عن الاخرين بعدما كنا مسئولين منهم
حاجة حلوة أوي إني مسئولة عن أطفال في شغلي دلوقتي
وحاجة أحلى وأجمل الوقت اللي بنقضيه سوا أصحاب :)
دول بجد أجمل حاجة في حياتي
من أصغر حد لأكبر حد
وحشتني اللمّة والضحكة اللي ملهاش حساب والدمعة اللي بتتصان
وحشني المعنى الأصيل
وحشتني الدنيا بتاعتي أنا
بس إيمان وحشتني أكتر بعدما وقتي معاها قلّ كتير
نفسي أنكشها عشان تنطلق
نفسي آخد أجازة من عقلي ومن مشاعري وانطلق في الحياة بروحي بس
نفسي اروح مكان أخضر كبير وأعيش مع نفسي
في الحتة الصغنونة اللي جوايا اللي انا بس بحسّ بجمالها
بيني وبينها وبسسس
والشقاوة اللي محدش يعرف عنها حاجة
والجنون اللي محدش شافه
واتطمن من قلبي
نفسي
..
إيمان