انهرده و في المترو .. كمية بني آدمين فظيعة رغم إنه الوقت كان متأخر .. و المحطة تقريبا بعد بداية الخط بحاجة بسيطة .. عادي منظر بيتكرر .. إنك تلاقي شباب - زي الورد على حد التعبير المصري - قاعدين و ستات عواجيز واقفين و شايلين .. ده بقى العادي .. بس الموقف انهرده كان مستفز للغاية .. قرب نص الليل و عربية السيدات مليانة رجالة قاعدين .. و رغم تصاعد الصيحات بإنه " مفيش دم " و " حسبي الله و نعم الوكيل "و " عندكو عربياتكو " إلخ .. إلا إنه برضه مفيش دم .. وكله عامل ودن من طين وودن من عجين ولا كأن الكلام ليه .. وفعلا الكلام مش ليه .. الكلام للرجالة اللي بجد .. أعتقد فيه راجل ممكن يكون فعلا طول اليوم بيشتغل وتعبان و طالع عينه ومش قادر يقف .. لكني مش مقتنعة انه كلهم كده .. وباسأل نفسي لما بيشوف ست قد أمه واقفة دمه ازاي مبيكونش حر و يقوم ويقعدها .. وبعدين أساسا الست أو البنت أضعف و أرق من الراجل .. والعربية دي عشان الستات لحمايتهم و لأشياء أخرى .. ليه محدش بيحترم ده .. فيه ناس كتير شايفين إنه الست أصلا مبقتش محتاجة للراجل و زيها زيه و يمكن أحسن .. تقدر تصرف على نفسها و تحمي نفسها و تدافع عن نفسها وتعيش لوحدها .. و رغم إنه الكلام ده فيه جزء من الصواب و رغم إنه البنات اللي بتتهافت على عربية السيدات فيهم بنات لابسين بشكل ملفت جدا أو أكتر .. يعني كده كده هما مش محافظين على نفسهم .. لكن برضه ده حق وده ميمنعش انه البنت مهما كانت فهي أضعف و انه الراجل سواءا كان فارس عربي أو جنتلمان أجنبي لازم يعرف ازاي يتعامل مع البنت و ازاي يحميها و انه أي بنت مكان أخته أو أمه أو مراته أو بنته .. محدش سأل نفسه لو بنت راجعة في وقت متأخر ممكن تكون فين .. غالبا حتكون راجعة من شغلها أو كانت بتشتري حاجات كتير أو يمكن مسافرة و يمكن كانت خارجة مع صحابها .. يمكن .. لكن كل ده يستدعي إنه الرجل ذو القوة العضلية الأقدر يستخدم تلك القوة في التحمل عن الأخريات بدل ما تقتصر تلك القوة على الجيم .. وعلى الرغم انه البنت تقدر تدفع لنفسها و تعزم الراجل كمان أو تعدي الشارع لوحدها أو تواجه أي موقف بمفردها لكن لازم يبقى فيه مبرر لوجود الراجل اجتماعيا ولازم يكون فيه فرق بين مجتمع بنات فقط ومجتمع فيه رجل بجد .. وحقيقي بقت بتفرق جدا لما البنت بتقابل راجل حقيقي .. الله يرحم رجالة زمان كان الرجل رفيق و رقيق و رحيم و في الوقت نفسه شهم و شجاع و قوي و حيي .. ويرحم بنات زمان كمان كانت البنت حيية و رقيقة و محترمة .. ويا من تبقوا مما مضى
" رفقا بالقوارير "
No comments:
Post a Comment