الحياة ألوان مختلفة

مبدئيا وبعد السلام عليكم .. يومكم زي الفل .. طبعا إسم البوست ده زي إسم بلوج سوزان محسن .. بس بصراحة ملقتش أنسب منه للبوست ده .. حقيقي الحياة ألوان مختلفة .. و السعادة ألوان مختلفة .. و مذاقات مختلفة .. بس إحنا اللي بتعود على تلت أربع نكهات وبنكسل ندور على نكهات جديدة .. من رحمة ربنا بينا إنه جعل لنا مشاعر بالفرح مختلفة .. يعني مثلا فيه حاجات كتير حلوة في الدنيا زي ما فيه حاجات وحشة .. لكني انتبهت لحاجة مؤخرا .. نكهات الفرحة والراحة .. قد أيه متنوعة

**

حليم بيقول مالقيت فرحان في الدنيا زي الفرحان بنجاحه .. للنجاح فرحة جميلة مفعمة بالحماس والأمل والفخر وبالذات لو بعد تعب جامد .. افتكر لما تبقى خارج من امتحان مادة صعبة طلع عينك في مذاكرتها وكان امتحانها صعب وحليت من غير غش ولقيت نتيجتك امتياز .. أجزم انك لو غشيت او كان الامتحان سهل عمرك ما حتحس بالفرحة اللي بتزغزغ قلبك و بتبان في عنيك ولا بالفخر بنفسك

**

فرحة الحب و الخطوبة اللي بتخليك شايف كل الناس حلوين و الحياة مزقططة في عيونك و بتغرسك في بستان ورود متجدد مع طيف حبيبك .. ودقات قلبك لما بتشوفه وعلى رأي حليم تاني " يا عنيا يا قلبي جرى أيه .. الدنيا احلوت كده ليه ياصحابي يا أهلي يا جيراني أنا عايز أخدكو في أحضاني .. مش قادر على فرحة قلبي .. مش قادر أبدا يا حبايبي

** "

فرحة الصداقة لما تلاقي حد مش من دمك ولا له مصلحة عندك بيحبك في الله ويتمنالك الخير ويقف جنبك بكل ما فيه ويفرح لك كأنه هو اللي جاله الفرح وتتعرى من محاسنك وحكمتك أمامه فيغطيك بروحه ودمه

**

فرحة الزواج .. إن فيه بني آدم تاني حيقاسمك حياتك وبيتك ولقمتك .. إنك حتلاقي حضن آمن و مش حتعدي الشارع لوحدك بعد كده .. دفء انك تبني بيت مع شخص واحد بس كل تفاصيله بتاعتكو انتوا

**

فرحة الحمل ووجود طفل حتة منك تعيش معاه طفولتك وطفولته تكون مسئول عن أكله وشربه و فرحته و تربيته و حياته .. تغرس فيه بذور بكرة بتاعه .. فرحة مختلفة تماما لما تشوف حتة منك بتجري ع الأرض

**

فرحة الشفاء من مرض .. أو لما تنجو من كارثة محققة فرحة بتحسسك إنه ربنا موجود و خد بالك كل ما عندك من نعم هي من عند الله ممكن ياخدها أي وقت فاشكره عليها

**

فرحة الإنجاز في شغلك .. انه دماغك ولدت ابتكار و إبداع .. بتاعك لوحدك أو مع حد بس لمست بإيدك جهدك وذكاءك

**

فرحة إحساسك بإن ربنا معاك وانت بتسجد تحس ان قلبك مرتاح .. لما تشوف رؤيا تنبهك أو تبشرك .. ربنا بيقولك أنا جنبك اطمن .. وتحس إنك في معية الله وقريب جداااا

**

فرحة وجود أمك وأبوك واخواتك واهلك جنبك ناس حضنهم مفتوح لك مهما كنت ناس بتحبك من غير شروط .. أمك وأبوك سبب وجودك المباشر بعد الله سبحانه وتعالى من النظر في وجوههم عبادة نعمة لا يقدرها إلا من فقدها بجد

**

فرحة تقديم العطاء للغير بدون مقابل .. لما بتساعد حد متعرفوش قلبك بينشرح حتى لو عندك هموم العالم متعرفش ليه .. بخترق قلبك نور ينور ما بين روحك وعيونك

**

فرحة الإبداع لما تحس بمعاناة المبدع وسعادته لما إبداعه يخرج للنور ويلاقي نجاح وأنوار مش صناعية حوالين إسمه

**

فرحة العودة للذكريات الحلوة لما بتوشوش روحك ببراءة وطهر .. فرحة الانتصار على نفسك لما تتغلب على شعور أو عادة بتضايقك وتحس إنك أقوى منها

**

فرحة اقتناء الأشياء الجديدة .. فرحة المفاجآت .. فرحة الإحساس بالطبيعة .. فرحة تعلم العلم .. فرحة انك تصحى الصبح تبص لوشك تلاقيه نضر وعنيك مزقططة ومرتاحة وصوتك رنان وواثق

**

ياااه لو قعدنا نعد مش حنخلص .. بس إحنا بنركز على حاجة واحدة كأنها الحاجة الأولى والأخيرة والوحيدة اللي في الدنيا ممكن تفرحنا مع إن الفرح له ألف نكهة وألف شكل ولون كلهم مختلفين تماما وسعادتهم مختلفة وحقيقية .. ألوان النعيم في الجنة ما لا عين رأت ولا أذن سمعت ولا خطر على قلب بشر لكل اللي ناقصاه فرحة في الدنيا اتطمن حتلاقيها في الجنة ومتخليش تركيزك على المفقود عشان تستشعر حلاوة الموجود فعلا عندك وغيرك بيتمنوه .. صاحبتي المفكرة مي الغروري قالت لي مرة :"إيمان إحنا بنتمنى حاجات محتاجين لها و بنحزن انها مجتش .. بس تخيلي إنه بنت في سننا تكون محجوزة في مستشفى وعندها مرض لا يرجى الشفاء منه وتقول في نفسها يا بختك يا مي بتخرجي وقت ما تحبي ياريتني ابقى زيك .. كل أملها في الحياة ربنا يشفيها "

.. مين اللي قال الحياة غير عادلة لأ .. الحياة عادلة .. بس كل واحد بياخد نصيبه فلو معندكش فراخ مثلا حتلاقي عندك سلطة و خضار أكتر من حد تاني .. وعشان نعرف نصيبنا قد اللي قدامنا ولا لأ لازم نمر على حياتنا وحياته كلها بعد ما تنتهي .. وسبحان الله .. اللي سنه كبير يعرف ده لكن احنا .... يا رب نسألك الرضا في الشدة والرخاء .. نسألك نعيما لا ينفذ وقرة عين لا تنقطع .. نسألك الفردوس الأعلى ومجاورة الرسول عليه الصلاة والسلام وأن نرى الصحابة رضى الله عنهم ونتحدث معهم .. نسألك أن تعوضنا من لدنك خيرا دنيا وآخرة .. نسألك رزقا بغير حساب من حيث لا نحتسب .. لكم كل الحب .. نهاركم زي الحليب .. سلام

" مش كل شئ بيفوت فـ عمرنا بيجرح

قلب الحياه مليان حاجات .. وبتفرح "