جيت أقول مبروووووووووك

مبرووووووووووووك من كل قلبي و عقلي كمان

للحاجة الوحيدة اللي فرحتني بجد في ظل الأخبار و الأحداث السيئة و الظروف المحزنة القائمة واللي ربنا يعديها على خير و يكملها بالستر يا رب

بجد حسيتها قوي و افتكرت جملة أحمد عز ف فيلم حب البنات " حلو طعم النجاح الفظيع ؟ " بجد مفيش أحلى من طعم النجاح الفظيع

لقيت نفسي - رغم اني مليش ف الكورة و مشفتش غير الماتش النهائي و معرفش فيها غير الأجوان - باشجع بحماس رغم اني اتكسفت أخرج كل الفرحة اللي جوايا قدام الناس فاكتفيت اني اصقف و اردد ورا اللي بيغنوا و يشجعوا .. لكن لو عليا كان نفسي أمسك الدف و اقول تم تا تم تم تم مصر و الناس تقول ورايا .. إحساس رائع و جميل .. إحساس بمجهود كل لاعب مصري ف الملعب حتى لو مجابشي جون .. ففي نظري كلهم أصحاب الأجوان .. كلهم تعبوا جدا جدا جدا و يمكن الحظ محالفشي بعضهم زي متعب مثلا .. لكن على المرء أن يسعى و ليس عليه إدارك النجاح .. و الحمدلله ربنا كلل سعيهم بالتألق لهم جميعا دون استثناء .. و الفرحة و الفوز فجرت الحب و الطاقة جوه القلوب .. حب و احترام الناس للاعب اللي بيخرج و الاحتياطي اللي بيدخل و اللي شاط الكورة واللي أخدها و اللي أخدها بمجهود و اللي جاب جون واللي اتحمل الإصابة أو الوقوع .. و على الرغم من الجمال و الفن اللي عليه كل اللعيبة إلا إني أكثر إعجابا بعصام الحضري .. اللي بجد صدق من سماه السد العالي .. قد أيه مركز .. قد أيه عجبني لما قام بعدما وقع و اتخبط جامد على رجله عشان يكمل .. و لما مفقدشي تركيزه طول الوقت .. بجد " الله عليك يا حضري .. ربنا يبارك لك يا رب " .. السنة الجاية إن شاء الله عاملة خطة فظيعة للاحتفال باليوم ده بس ربنا يكرم .. بجد مش عارفة اقول ايه الكلام كله راح .. بس الفرحة لسة موجوده و بتتألق مع كل مشهد من الفرحة و التعب باشوفه أو باشوف إعادته ف التليفزيون

ربنا يكرم حسن شحاته و كل لاعبي المنتخب المصري ع الأداء المجتهد المتألق ده .. و الفرحة اللي غرسوها ف قلب كل مصري

جزاكم الله خيرا فردا فردا و يارب عقبى لكأس العالم يا رب