انطباعات أولى

الانطباعات الأولى .. الله أعلم

.......

بصوا يا رجالة .. صدق من قال إنه اللي بيخرج من القلب بيوصل للقلب .. ده حقيقي بشهادتي شخصيا :) بدليل إني لحد دلوقتي باحس بحب عنترة لعبلة ف كل كلمة من قصايده و بإنه بجد زي ما هو كاتب .. الصدق خالد

اممممم

من شوية دخلت على بلوج قضية عم أحمد لقيت شاب متفائل و كله أمل و رقي .. الحقيقة بعد ما دخلت المدونة و من الحاجات البسيطة جدا زي التعريفات و الحاجات دي حسيت إحساس بالأمل كده غريب رسم ابتسامة على وجهي .. قلت يا واد طنش خالث أما نثوف أخرتها .. و انا باقلب ف البوستات لقيت بوست لخطيبته شدني جدا صدقها في الكلام و برضه إحساسها بالأمل فروحت مدونتها كلام من جوه ومن الاخر و هي اسمها داليا .. حسيت من صورتها و كلامها كأني اعرفها من زمان .. بصوا المدونتين دول تحسوا انه الناس هناك من عصر مختلف .. تلمسوا الصدق في بوستاتهم .. و تحسوهم شخصيات ناضجة و رحيبة الصدور .. المهم الموضوع استهواني قعدت اشوف مدونات صحابهم لقيتهم على نفس الشاكلة طبعا ماهي الطيور على أشكالها تقع .. حسيت بنفس الإحساس كده لما تكون بتاكل في مكان و ناس متعرفهمش حواليك بتاكل و تحس انه الإنسانية بتجمعكم .. زي لحظات تكبيرات العيد أو مثلا لحظة فطار رمضان لو كنت ف المواصلات .. حاجة كده .. و هذه هي الانطباعات الأولى و أحاسيس مزيج من الإنسانية و الحب و الأخوة .. حقيقي ربنا يسعد الناس دي بجد و يصلح لهم أحوالهم على قد ما أسعدوني بمجرد كلمات بسيطة

معرفش ليه باقول الكلمتين دول بس حبيت احكي لكو إحساسي