بسم الله الرحمن الرحيم
فيه حاجة أنا ملاحظاها و عاوزة أتكلم شوية عنها .. و ده مجرد رأي باعتز بيه و طبعا الاختلاف حقكوا
اشتركت ف الفيس بوك من فترة صغيرة .. و الفيس بوك ده عبارة عن صفحة خاصة بيك بتتيح لك التواصل مع أصحابك بشكل رومانتيك و التعبير عن شخصيتك ببساطة
و طبعا النت مفتوح فتلاقي مثلا حد باعت لحد آيات قرآنيه و تحتها على طول بنات بالبيكيني .. سبحان الله
و تلاقي مثلا لو فيه ولد و بنت أصدقاء ( زي الاخوات يعني ) ممكن يبعتوا لبعض
hugs
أو ما شابه .. والله يا جماعة أنا بقيت مش مصدقة نفسي و باقول أكيد أنا قريت غلط
فكروني بمذيعة و ممثلة و مغنية ما .. و جميلة جدا بالمناسبة .. كانت بتبعت قبلات ع الهوا .. و استضافوها ف برنامج فقالت هي دي حقيقية ؟؟ دي ع الهوا بس !! زي التمثيل بالظبط كده .. البطلة هي اللي بتؤدي مش الممثلة نفسها
ياه ع التناقض يااااه
زي الناس اللي بتنتقد الدعاة السلفيين و يقولوا دول متزمتين و تنتقد الدعاة الشباب و يقولوا دول كاجوال
طبعا أنا كمان أكيد فيا تناقض يعني مثلا باحط أغاني و باحط أدعية و باتكلم عن أفلام و هكذا
و كلنا عندنا من التناقض نسب حتى الناس المتدينيين جدا أو الفالتين جدا
اللي عاوزة اقوله و ده طبعا ولا فتوى ولا بتاع ده رأيي كإيمان إنه إذا كنا مش قادرين نتقي الله بشكل كامل فنحاول نوصل لحد أدنى يرضينا .. لما احط النهرده صورة بنت شبه عارية و ابعتها للناس أو أي صورة فاضحة حقول لربنا عنها إيه لما يسألني .. يا ترى هقوله ده انا كنت باضحك مع اصحابي و مكنتش اقصد و كلهم بيبصوا لها نظرة شرعية
و بعدين دي صورة مش بنت ع الحقيقة
و لما يكون فيه زميل بالنسبة لي زي أخ و ابعت له حاجات زي اللي فوق يبقى حقول لربنا ده زي اخويا بالظبط يعني محرم
الواحد بيموت و بتفضل الحاجات دي موجوده و العداد شغال و ربنا يغفر لنا جميعا و أنا معكم
و ده عامل زي الفن للفن و الأدب للأدب بصرف النظر عن أي شئ آخر .. و معتقدش إنه الدين أو الأخلاق بتحرم الفن أو الأدب بس كل شئ ممكن بالتلميح المهذب اللي يخدم مضمونه و الرمزية حتى ف الواقعية في رأيي ممكنة و مفهومة و الأفلام مش زي الواقع .. و الموهبة نعمة عظيمة جدا من عند الله و أصحاب المواهب يعلمون .. ربنا مش مدينا النعمة دي عشان نعصيه بيها بحاجات حتضرنا برضه بس يمكن على المدى البعيد .. الحاجات الصغيرة - أحيانا - بيكون تأثيرها أبشع من الحاجات الكبيرة و بالذات لو استصغرناها
بصوا بقى حتى لو اتقال عني متخلفة أو مكبراها أوك
نحن بشر ضعفاء نخطئ و نصيب و لسنا أنبياء أو آلهة حتى نقول الكلمة الأخيرة في الدنيا و نتحرر من ثياب الخلق و الدين معبرين عن الجمال في ذاته الطبيعية و نظلمه بقصره فقط في الجسد و إنما الجمال هو الفطرة النقية كما خلقنا الله و الفطرة هي الستر و الحياء و لو لم نستطع أن نكون على الفطرة تماما ع الأقل لا ندمرها
اللهم اهدنا جميعا و اعذروني على هذا البوست الجرئ الغريب نوعا ما عن أسلوب كتاباتي
و الرزق على الله :)
3 comments:
تسلم إيدك
تبقى قضية مهمة . أو أراها مهمة ، لا يعني التناقض الهروب إلى أحد الطريقين . فأفر غلى جانب الصورة تماما وأقول يعني هو أنت عاوزني اضحك على الناس . أنا حد صادق مع نفسه ومع من حوله .. وهات يا هرتلة في الليل والنهار ..
حقيقي شكرا كثيرا على الموضوع
كل الود
محمد العدوي
أشكرك لزيارتك و تعليقك
نورت البلوج
Post a Comment