من هـــــــــاله حبيبتي

الصديقة العزيزة هالة شبايك مررت لي تاج جزاها الله خيرا :)

و فكرتني بتاج كنت كاتباه زماااااااااااااااااااااان همرره لها بعد ما اجاوب على ده بإذن الله :)

أصلي كنت كاتباه و مش عارفة أمرره لمين كل اصحابي بيكرهوا التاجات

جيتي لقضاكي برجليكي يا شابة :)

لو قالولك اختارعصر من عصور مصر عشان تعيش فيه تختار اى عصر وفى عهد اى حاكم واشمعنى؟

ممممممم

هو لازم مصر يعني .. أنا كان نفسي جداا أعيش في عصر عمر بن الخطاب .. الراجل ده باحترمه جدا و يا رب أتكلم معاه في الجنة

عشان قوي و راجل و مؤمن بحق

اللي يخرج جهرا يوم الهجرة على فرسه ف عز الضهر و يقول من أراد أن تترمل زوجته أو يتيم أبناؤه فليلقني و غيرها من مواقف التواضع و الرحمة رغم قوته يبقى رجل بمعنى الكلمة

و الرجال قليل
اول اولوية فى حياتك عيلتك ولا شغلك ولا اصحابك؟

أسرتي و أصحابي اللي باعتبرهم من أسرتي
ايه اكتر حاجة بتحبها فى رمضان؟

الفطار الجماعي ف أي حتة .. عيون بتاعة أوه تي في .. زينة الأماكن الشعبية .. و كنت باحب أرجع م الجامعة و هو الآذان بيؤذن معرفش ليه بافرح زي الأطفال وقتها بجد .. و جري الشباب ورا عمل الخير و بالذات كوبايات البلح زي ما هالة قالت بالظبط .. و أغنية رمضان جانا .. و أغنية بركة رمضان عشان ببايا كان بيحبها
اوصف ليا اجمل فطار ممكن تفطره؟

مممممممم

الواحد ريقه هيجري كده

أولا يكون عند تيتا

أمتع حاجة بالنسبة لي دوما و فور إيفر الفراخ حبيبي .. أجمل فطار صينية بطاطس بالفراخ و لسان عصفور و طرشي من العلمين و عيش محمص و كوباية حليب بالتمر
لو انت حاكم على مجموعة من الافراد حتكون عادل؟ طب حتعمل ايه عشان تتأكد انك حاكم عادل؟

ححط نفسي مكانهم و اتحرى تقوى الله زي ما كان عمر رضي الله عنه بيعمل .. ححاول و ربنا يقدرني
اللى بيبوظ الحكام ..نفسهم ولا الشعب ولا الحاشية المقربة؟؟

أنفسهم .. البني آدم مسئول عن تصرفاته و ضميره و خوفه من ربنا لازم يوجهوه
مين اكتر اعلامى مصرى بتحترمه؟؟

الحقيقة مش فاكرة بس اليومين دول عجباني جدا هند صبري ف برنامج الشقة .. مخلية ضيوفها فري و مبتكرة و بتحترم كرسيها و هي على طبيعتها برضه

بس مش مصرية برضه
قريت ديوان عمر مصطفى صاحب بلوج تجربة" اسباب وجيهة للفرح" عن دار ملامح ولا لسه؟؟

لا

بس سؤال وجيه يعني اشمعنى الديوان ده !!؟؟ هه
لو ممكن تشتغل شغلانة تانية غير اللى انت بتشتغلها او كنت بتشتغلها كنت تتمنى تبقى ايه؟؟
أتمنى أشتغل أي حاجة بصوتي كلام .. يعني مذيعة راديو .. في مسلسلات الكارتون .. في مسلسلات الإذاعة .. في إعلانات الراديو .. كله شغال
ايه تانى بلد تتمنى تعيش فيها بعد مصر؟؟

المدينة المنورة
اوصف ليا ترتيبات اجمل فرح ممكن تحضره؟؟

واو

ممكن يكون بالحناطير على كوبري ف اسكندرية و المزيكا شغالة بقى و الحصان عمال يرقص عشان العريس و العروسة يتقلبوا من فوق الكوبري :)
بتراعى كلام الناس والقيل والقال؟ لو اه او لو لا قولى ليه؟

دي مشكلة حياتي

ليه ؟ عشان باحاول أحافظ على مظهري

بس أوعدك قريبا جدا إن شاء الله هتنتهي

صحيت من النوم مالقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنة حتبقى سعيد؟

جداااااااااااااااااااااااااااااااااااااااااا

فوق الخيال

ده انا نفسي الزمن الرومانسي بتاع الفرسان ده يرجع واااااااااو

بس ينفع احتفظ بالموبايل بس ؟
السعادة هى؟؟

الإيمان بالله و كتبه و رسله و اليوم الاخر و القدر خيره و شره

و الرضـــــــــــــــــــــــــــــــــــــــــــــــــــــــــــا

عندك امل ؟ اسبابك ؟
دي أمل دي أعز أصحابي :)

متهيألي شوية

عشان ربنا لسة عنده أمل فيا

و النهرده يوم جديد
لما تحب تهرب من كل شىء بتروح فين؟؟

بادعي ربنا

باعيط لحد ما اتعب فاتخمد انام

باهييس بضمير
امتى اول مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟
أول مرة أنزل بعد ما قبضت مرتبي و دفعت مصاريف مواصلاتي و شربي كلها
لما بتعمل عمل خيرى بيكون ايه هو دافعك الاول؟؟
مساعدة الغير .. دي لوحدها سعادة تشيل أي هم في الدنيا
بتشرب سجاير؟لو الاجابة اه ايه شعورك لو شفت ست بتشرب سجاير وليه؟

يجطعوني ف البلد يا بيه

والله لسة مجربتوش الشعور ده بس متهيألي فتور
بتعرف ايدك اليمين من الشمال ازاى؟
اليمين اللي ناحية الحيطة بتاعة الفصل :) و لسة معلماهم من قريب
ايه اكتر اله موسيقية بتحبها؟

البيانو
فى رأيك ليه الذوق والنخوة اتعدموا؟
لا متعدموش ده أولا

ثانيا هما قلوا بس عشان مبقاش التكالب ع الحياة مخلي حاجة حاجة بجد

مفيش بشر .. مفيش رجال .. مفيش سيدات

بكل فخر
ايه الحاجة اللى لو حصلتلك تبقى سعيد قوى؟

أطبع أول ديوان

و ألاقي البني آدم اللي هيشراكني مصاريف طبعه
تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟

ولا حاجة من دول

بس لو لابد يعني يبقى شقة معقولة و عربية معقولة و موبايل مش معقول
البحر ولا النيل؟؟؟

البحر
مركب ولا طيارة؟
سفينة طبعا
عاقل ولا مجنون؟

مجنون جداااا
تقرا كتاب ولا تتفرج على فيلم؟

فيلم أجنبي
بتمرر التاج لمين؟؟

اه

جينا للاختيار

بما إن محدش بيدخل ع النت دلوقتي و كده صيام بقى و كل سنة و حضرتك طيب فمش بمرره لحد

و كفاية أنا :) ماشي يا هالة لما أشوفك النهرده

ملحوظة مش مهمة اوي : مش عارفة ليه حاسة انه تقمصتني روح الراجل بتاع الضرايب مصلحتك أولا :)