ترتيبات قدرية

لي صديقة حبيبة - عارفة نفسها كويس - فقدت كل الأرقام على موبايلها

الحقيقة أول ما سمعت ده فرحت جدااا

و أتمنيت - على استحياء - لو يحصل لي كده برضه

حسيتها بداية جديدة و جميلة أو على الأحرى - يعني بالأدق - ميلاد جديد

زمان كنت بازعل جدااا لو حاجة بحبها ضاعت

دلوقتي بافرح

حاسة ان الحاجات اللي تستاهل بجد عمرها ما هتضيع هتفضل جوانا أو جوانا منها عبقها

مبقتش باتعلق - زي زمان - بالذكريات و مبتحركش جوايا كتير

ياما صحاب كتبوا لي كروت ف عيد ميلادي أكيد منها الصادق و منها المجامل

الصاحب الحقيقي اللي يعمل معاك موقف عمرك ما تنساه

لو الواحد مثلا غير رقم موبايله اللي معاه من سنين لا يمكن حيديه لكل اللي كان معاهم قبل كده

لازم يفلتر

و لما الفلترة دي تتم تلقائي بتكون ممتعة عشان بتكون قدرية

لو اضطريت مثلا لمسح 500 صورة من موبايلك و الاحتفاظ بـ50 بس

يبقى الخمسين دول - ببساطة - هما اللي يستاهلوا

مش شرط بس انا حساها كده و سعيدة جدااا بالإحساس ده

و لما متلاقيش رقم حد و تلف تدور عليه و تتعب عشانه يبقى يمكن يكون يستاهل

بالمناسبة

كان ليا قرايب من بعيد ف محافظة تانية و كان لي معاهم ذكريات ممتعة و عشرة صادقة

بعد فترة انقطاع من غير سبب لمدة حوالي 6/7 سنين

جم على بالي

و لفيت ادور على رقم تليفونهم عند كل قرايبنا

و اسأل كل حد رايح المحافظة دي أو يعرف حد فيها

كنت من جوايا هتجنن و اوصل لهم

لو اطول .. لو اعرف العنوان كنت سافرت لهم لو ينفع كنت اتصلت بيهم

سنتين و نص تقريبا

و اتصلت بالسنترال هناك و قلبت الدنيا

المهم

ف يوم و من غير مقدمات رجعت البيت لقيت حد منهم عندنا

مصدقتش نفسي

و قعدت اعيط من الفرحة

بعدها استعدت نفسي و قوتي و فرحت جدا لفترة صغيرة

لأنهم مطلعوش زي ما كنت فاكرة

مش كل حاجة بنعتقد انها لو حصلت هتسعدنا تبقى فعلا هتسعدنا

لكن مهم نستمتع باللحظة من غير ما نستنفذ مشاعرنا فيها عشان منتصدمش بعد كده

فيه ناس بتظهر لك ف وقت مش وقتها خالص و تشقلب كل حياتك

لما نشوف ترتيبات ربنا بجد ننبهر و نسعد

أهم حاجة نفرح براحة و نحزن بالراحة مفيش شئ دايم إلا وجه الله

و نفتكر دايما " أحبب حبيبك هونا ما عسى أن يكون بغيضك يوما "

و دمتم بالخير

دول كانوا كلمتين كده من القلب معرفش طلعوا ازاي !!