الحمد لله على نعمة الأصدقاء و الله نعمة كبيرة جداحد بيحبك لوجه الله من غير مصالح مادية .. حد يتمنى يسعدك و ميحبش يشوفك حزين .. يتعب لك لو حسيت بتعب .. يزقك ع النجاح .. و يشدك من أي ضرر .. يبقى فرحك فرحه .. يفضفض لك فرحه و همومه و يسمع ليك ..يهمه يتطمن عليك .. يحس إن انت و هو واحد .. تكشف أوراقك الخطيرة قدامه و انت متأكد إنه هيحافظ عليك و هيتقبلك بعيوبك و أخطاءك و مش هيفهمك غلط .. و هيلتمس لك أعذار ,, و مش هيعايرك ف يوم حتى لو علاقتكم اتقطعت .. تتعشم فيه و يتحملك .. تلاقيه جنبك وقت ما تحتاجه
بيقولوا : بص ع الواحد و هندامه تعرف اهتمام مراته بيه
متهيألي كمان الواحد مرايه لصحابه .. و هما مرايه له .. صعب جدا تلاقي حد كويس و صحابه وحشين إلا إذا كان مخدوع بيهم .. أو هما كويسين من جواهم بس فاضل لهم شوية
الفترة الأخيرة حسيت بشئ فرحني جدا جدا .. لأول مرة أحس إنه أصحابي زي أهلي .. بافتقد الأمان بعيد عنهم و أحسه بينهم .. و اطمن على نفسي معاهم .. مزيج غريب من الثقة و الفرحة و الاحتياج
مش لازم الواحد يعرف الناس فترة كبيرة .. كفاية يقرب منهم صح و يتحط معاهم في مواقف
لما تحس إنه صاحبك مش خايف على صورته قدامك و على طبيعته اعرف إنك صاحبه بجد
لما تحس إنه مش بيرتب لكلامه معاك و وقت ما بتخطر على باله بيكلمك .. اعرف إنه بيعتبرك صديق بجد
فيه نقطة نور عندك لو اتقابلت مع نقطة النور عند اللي قدامك ف لحظة معينة اعرف إن فيه شعور جديد جميل بيتولد .. شعور الصداقة
ذكرى نقطة النور دي بتفضل موجوده .. يعني لما تبص ف عين صاحبك فتفهموا بعض .. أو ييجي على بالك تلاقيه بيكلمك .. أو يعيا - لا قدر الله - تلاقيك عييت زيه بالظبط .. أو تيجي ف بالكم نفس الحاجة ف لحظة واحدة إعرف أن نقطة النور بتحبي و خليك متابعها بقى .. قمة الصدق و الفرح
ده غير إنه فيه وقت بيبقى له متعة خاصة مع الأصدقاء
الحمد لله تأثير أصحابي ف حياتي إيجابي .. الحمد لله .. و ربنا يجازيهم عني كل خير يا رب .. ربا يكتب لهم السعادة في الدارين و يقدرني أكون الصديقة اللي هما محتاجينها
1 comment:
موضوع يلمس القلب حقاً.. لا حرمكِ الله منهم، ولا حرمهم منكِ
Post a Comment