أريد عريسا .. أريد عروسة

قررت اكتب الموضوع ده لكل الناس و لنفسي و لأصحابي ،، عشان أقراه ( كلما أحتاج ذلك )1

الواحد بيوصل سن 22 سنة مثلا و يدأ يفكر ( بشكل جدي ) في فارس الأحلام أو فتاة الأحلام .. و يا سلام بقى لو كان ارتباطه عن قصة حب فظيعة جدا و ربنا سبحانه و تعالى كتب لها النجاح ..مش هزعل أبدا بعد كده .. واو بجد

.....

يبدأ الواحد يدعبس في الناس اللي حواليه .. ميلاقيش حد مناسب .. أو ميتشدش لحد .. أو ميكونش أصلا حواليه حد .. و يفكر و يفكر .. هو الحب بجد ممكن ييجي بعد الجواز ولا لازم يتجوز عن حب ؟! .. طيب ما هو فيه جوازات عن حب فشلت و فيه جواز تقليدي نجح ! .. ولا دي حالات خاصة؟؟؟ .. طيب ما هو ممكن أحبه / أحبها في الخطوبة .. بس يا ترى هيكون بنفس القوة لو كان الحب قبل الجواز ؟؟؟.. بس قبل الجواز بيبقى فيه تجميل نوعا ما للشخصيات عشان كل واحد يظهر في أحسن صورة لكن بعد الجواز بيبقى كل واحد على حقيقته و فيه عشرة عمر عن معرفة حقيقية.. بس انا بعد كده ححتاج لحاجات تانية أهم مـ الحب زي الاستقرار و أنه يكون لي أولاد و إني لما أكبر في السن مبقاش وحيد بعد ما اخواتي يتجوزوا :(

.....

يبص على اللي حواليه

ماما و بابا اتجوزوا تقليدي و عايشين كويسين .. اه بس ده كان على أيامهم .. طيب ماهي مرفت أمين في الفيلم كانت بتحبه و مبسوطة بيه و اتجوزت واحد تاني و عاشت سعيدة و حبته .. اه بس سعاد حسني في الفيلم التاني حبته و اتجوزته و عاشت مبسوطة جدا .. مممم طيب ما هبة بنت طنط فكيهة جارتنا اتخطبت .. و حسين ابن عمي اتجوز الأسبوع اللي فات .. و نعيمة بنت ابن عمة الحاج محمد الفكهاني اتجوزت .. و ماريهان زميلتي اللي ف سني اتجوزت و معاها مايكل دلوقتي ..و كل قرايبنا اللي ف سني اتجوزوا و الدور عليا ( تقولوش دور طابور العيش :) طب هو العيب فيا ولا ايه .. اه أكيد فيا و غالبا بينتهي الحوار ده يا بانتحار يا بعنبرالحالات الخطرة :) ولا بقى الكلام اللي يخليها تكمل هو طبعا من غير قصد بس بيوجع القلب " نفسي افرح بيكي " / " انتي لسة متخطبتيش لحد دلوقتي !!! " و تلاقي دلوقتي ده اللي هو21 سنة !! / " نفسي أحضر فرح .. شدي حيلك " نفسي أعرف تشد حيلها ازاي :) حاجة تفلق

.....

و يكتئب الواحد و مش بعيد يفقد الأمل في الجواز خالص و يا سلام بقى لو اتقدم العمر شوية يعني مثلا 26 / 27 سنة و يبدأ الواحد يتنازل و يهيئ نفسه على انه فاته القطر بقى و المحطة قفلت

و طبعا المحطة بتقفل على البنات بس .. أما الولاد فعادة ممكن يفقدوا الأمل في إنهم يلاقوا اللي عايزينه بس مبيفقدوش الأمل في الجواز كله لأنه ببساطة هو اللي بيروح و يختار حتى لو عمره 50 سنة بالإضافة لنظرة المجتمع ( العادل ) اللي احنا فيه

.....

دار نقاش قبل كده بيني و بين زميلاتي : كل بنت لها نص تاني .. هتعيش يا إما هتلاقيه يا إما لأ .. طيب لو مالقتهوش و سنها اتقدم تعمل ايه ؟؟ .. فيه اللي قالت: تستنىحتى لو عاشت من غير جواز .. واللي قالت:تتجوز لو قدامها حد كويس بس في الحالة دي هتكون خلاص ارتبطت واتنازلت عن بعض حاجات

....

و الحيرة دي طبعا كتير مننا فيها .. هقولكم كلام ريحني جدا لما سمعته و بجد عايزة كل بنت / كل شاب يسمعوه

كنت مؤمنة بأن الزواج لا يمكن إلا أن يكون عن حب .. و مهما الناس تقنعني مفيش فايدة .. لحد ما سمعت شرائط الأستاذ عمرو خالد اسمهم " اختيار شريك الحياة ج 1 و ج 2" و " السعادة الزوجية " و على فكرة لينكاتهم موجودة ضمن لينكات محاضراته على موقعه ممكن اجيبهم للي عاوز.. المهم

قال حاجات روعة .. لما تسمعوا قصص الصحابة و الصحابيات و الحب اللي كان موجود بين الرسول عليه الصلاة و السلام و زوجاته حتلاقوا قمة الرومانسية .. الرحمة و المودة هي الرومانسية .. الرحمة يعني التعامل الكويس المهذب الرقيق جدا .. و المودة الإحسان للطرف التاني .. ده اللي شفته

و الله العظيم قصص و مواقف ماتعملش زيها ف الأفلام و لا حتى حبيبي دائما :) ولا تيتانيك و الله خلاني أقول أحسن نعمة في الزواج نعمة الزوج الصالح / الزوجة الصالحة أكتر رومانسية

قال ضمن ما قال : البنت اللي وصلت مثلا لـ 30 سنة و متجوزتش .. معلش .. ربنا شايل لك نصيبك .. انا عارف انك تعبانة لكن اصبري .. يمكن الوقت ده ربنا جاعله لك عشان تعملي حاجات تفيدك و تفيد الإسلام مش حتلاقي لها وقت بعد الجواز .. و رحت بعد كده بكتير ندوة للأستاذ مصطفى حسني في ساقية الصاوي أول سؤال جاله : بنت عمرها 23 سنة حاسة ان جوازها اتأخر .. قال : افرض انك مدير شركة و شايف أحوال الموظفين كلهم .. فلان محتاج تدريب .. يقعد وسط دول شهرين .. و فلان ممتاز .. يترقي .. و فلان عاوز يبقى جيد في كذا عشان يتنقل موقع أفضل بس محتاج ياخد كورس فترة 6 شهور .. و هكذا

لو انت بقى موظف هتفضل تسأل نفسك هو ليه مارقانيش !!

رغم انك لو عرفت حترتاح و تطمن و الأكتر من كده انك لو مثلا بتثق في حد و في حكمته مش هتسأله لما يقولك اعمل كذا هتعمل و انت مغمض أو لو واثق انه بيدور على مصلحتك هتسيبه يتصرف

و أقرب مثال لكده لو رايح تقص شعرك عند كوافير بتثق فيه و عاوز قصة جديدة حتسيب له شعرك خالص يعمل اللي يشوفه لأنه بارع ف مهنته و لله المثل الأعلى

نرجع للندوة : و قال فلنفترض إنك عصبية و دمعتك قريبة في الوقت نفسه .. تبقي محتاجة واحد يتحملك و يكون طيب و يعطف عليكي .. بس الواحد ده مش مهيأ لكده .. فبياخد فترة تدريب و بعدها ييجي لك

و فيه حديث للرسول عليه الصلاة و السلام بيقول : " لو اطلعتم على الغيب لاخترتم الواقع " يعني لو قريتوا الغيب هتختاروا الواقع عن رضا لأنه الواقع اللي ممكن نكون كارهينه قد يكون سبب في غيب نعشقه لن يأتي إلا من خلال الواقع ده " و عسى أن تكرهوا شيئا و هو خير لكم " / " و عسى أن تكرهوا شيئا و يجعل الله فيه خيرا كثيرا " 1

و قال كمان إنه تفكيرنا ف الحب من كتر فرجتنا ع التليفزيون فبدأ الموضوع ياخد مساحة واسعة من حياتنا يعني مثلا لو مسلسل عن الإمام الشافعي و هو خارج للعلم مراته تقوله : ترجع لنا بالسلامة يا شافعي :) حتى قطز لازم تكون معاه جهاد .. و حتى مازنجر كان لازم في كل مرة ينقذ أفروديت :) و تلاقي اصحابك و قرايبك و زمايلك و الناس في الشارع و الأغاني و القصص و الروايات و كله حب في حب فلازم تفكر في الحب و تشوف صورته المثالية من الواقع اللي ممكن يكون أحيانا غلط أو حرام و قال كمان أننا طبيعي حبنا للمعاصي عشان يكون فيه جهاد للنفس .. فلو شفت ولد و بنت راكبين عربية و مبسوطين طبيعي قلبك يتمنى ده لأنه الميل للجنس الآخر و الحب شئ فطري في الإنسان و عشان كده ربنا شرع الزواج لكن بتجاهد نفسك انه ده حرام فربنا بيعوضك بده بس في الحلال

و سمعت مرة برضه من شيخ انه الرزق - اللي ضمنه الزواج - بيكون مكتوب للإنسان من بعد 40 يوم من حمل أمه فيه يعني ريح بالك ( على رأي تامر حسني :) الموضوع مش ف إيدك كل اللي مطلوب منك هو السعي بالحلال و بس و الباقي على ربنا و والله سمعت حكايات لها العجب في معجزات حصلت في ناس مثلا كانوا فاقدين الأمل في الإنجاب و ربنا رزقهم لأنه ببساطة .. مراتك ماحدش هيتجوزها غيرك .. و جوزك هييجي لك .. هييجي لك :) إن شاء الله ارتااااااااااااااااااح و أخيرا بقى ده دعاء وصلني بالميل و يارب يرزقكم كلكم - و انا معاكم - بالأزواج الصالحين و الزوجات الصالحات و تجيبوا دبل زي الل فوق دي بإذن الله :)

بسم الله الرحمن الرحيم والحمد لله رب العالمين والصلاة والسلام علي الرسول اللهم أنى أسألك باني اشهد أن لا اله إلا أنت الأحد الصمد الذي لم يلد ولم يولد ولم يكن له كفوا أحد أقضي حاجتي وأنس وحدتي وفرج كربتي

اللهم أسألك أن تجعل لي رفيقا كي نسبحك كثيرا ونذكرك كثيرا يا مجيب المضطر أحلل عقدتي وفرج كربتي

يا ألهي هب لي من لدنك زوجا صالحا وأجعل لنا المودة والرحمة والسكن انك على كل شئ قدير يا من يقول للشيء كن فيكون اللهم أتنا في الدنيا حسنه وفى الآخرة حسنه وقنا عذاب النار

اللهم لا تزرني فردا وأنت خير الوارثين ( ممكن أن تقال أيضا هذا الدعاء للإنجاب ) وهي دعاء سيدنا ذكريا ع س اللهم تقبل والحمد لله رب العالمين و الصلاة والسلام علي اشرف المرسلين سيدنا محمد واله وصحبه أجمعين