لما البنات بتكبر

الكلام مش عام لكن أنا لاحظته فيا، وفـ كذا واحدة من صحباتي، لاسيما خريجات البيوت المتحفظة المقدسة لكلمة عيب ميصحش
البنت بعد سن 25 بتشوف الدنيا كل شوية بفستان جديد، وعمق أكتر، بتكون أسرع وأدق في الحكم على مشاعرها، بتتصالح مع نفسها وبتعيش على طبيعتها، بتفهم إن حاجات كتير قالولها عنها عيب مش عيب ولا حاجة، ومشاعر كتير علموها تخبيها ولما كشفتها محصلش أي شر، البنت لما بتكبر بتاخد الدنيا في حضنها، بتنطلق، بتحترم اختياراتها، بتمارس حقها في الجنون المشروع، بتبص للأمور بشكل جديد خالص لون عنيها هيّ، فالناس بالتالي بتشوفها على طبيعتها
شفت إني أكون نفسي فحسب، أضحك وابكي وقت ماعوز طالما ضحكتي مش خليعة، أعبر عن مشاعري صح للناس اللي بحبها أو بفرح لما بشوفها، أستعيل ساعات، واتجنن ساعات، واتفلسف ساعات، وأحب ساعات، ماهو الحب برضه قالولنا عليه عيب وميصحش واكتشفنا إنه عادي وكل الناس بتتنيل على عينها وتتكفي على بوزها وتحب، واستخدام اللغة المتشردة زي اللي بستخدمها دلوقتي :) مع إني قادرة على استخدام الفصحى هنا بس القافية حكمت :)
اتصالحت مع نفسي وبقينا سمن على عسل الحمدلله
لكل البنات الصغنططين شوية بقى عيشوا كما أنتم .. متكونيش أي حد غيرك، لبسك لازم يعبر عنك وكلامك وهزارك :) افتحي قلبك للدنيا
واعرفي إن كل الناس حتى أرقاهم مش معصومين من الخطأ ومش المفروض تكوني مثالية
مطلوب منك ببساطة كده تكوني نفسِك وبس.. تحبي نفسِك عشان هي حلوة.. تركزي معاها ساعات وتهتمي بشكلها قدام مرايتك.. وتاخدي من ضميرك صاحب وتراعي ربنا وتنتقي من نصائح أهلِك بعد ما تسمعيها وتفهميها دول فعلا أكتر ناس بيحبوكي ويتمنوا لك الخير وتكوني أحسن منهم ألف مرة حتى لو طريقتهم غلط، مش حتحتاجي ف يوم تعملي حاجة غصب عنك، حتكوني حقيقية :)