أجرأ بوست ممكن أكتبه في حياتي

"وَمِنْ آَيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآَيَاتٍ لِقَوْمٍ يَتَفَكَّرُون"

"فِطْرَةَ اللَّهِ الَّتِي فَطَرَ النَّاسَ عَلَيْهَا لَا تَبْدِيلَ لِخَلْقِ اللَّهِ ذَلِكَ الدِّينُ الْقَيِّمُ وَلَكِنَّ أَكْثَرَ النَّاسِ لَا يَعْلَمُونَ"

"رَبِّ لَا تَذَرْنِي فَرْدًا وَأَنْتَ خَيْرُ الْوَارِثِينَ"

"وَالَّذِينَ يَقُولُونَ رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا"

"هُنَّ لِبَاسٌ لَّكُمْ وَأَنتُمْ لِبَاسٌ لَّهُنَّ"

..

ده طبعا كلام ربنا مش كلامي

وكلكوا سيد العارفين وعارفين الأهمية القصوى التي أولاها الله عز وجل للزواج في الإسلام على اختلاف الثقافات والسن والجنس والأعراق وعلى اختلاف البشر

أنا مش هتكلم عن أهمية وجود شريك آخر لإيمان لكن حتكلم عن أهمية وجود شريك لأي حد في الدنيا

..

من فترة والناس - من صحابي - بيقولوا لي الجواز مش أهم حاجة .. كفاية كلام عن الحب والجواز .. بتتكلمي كتير كلام عاطفي .. إحنا عايشين من غير ارتباط ومبسوطين ومية فل واربعتاشر .. مينفعش الناس تبقى شايفة ده

ده كلامهم هما

كلامي أنا بقى للي يهمه إنه يقرا كلامه

الحب - العاطفي - شئ مهم جدا للإنسان .. اللي بيحسّ .. والاكتفاء العاطفي لا يتحقق إلا بوجود شريك آخر يزيد من جمال الحياة ولا يصنعه .. لأن الحياة وانت لوحدك ممكن تكون حلوة .. لكن وانت مع حد بتكون أحلى بكل تأكيد

الناس اللي بتقول ده حاجة من اتنين يا إما موجود عندها شريك رائع يا إما بتضحك على نفسها عشان تقدر تكمل لو مظهرش الشريك ده .. يا إما حبت أوي ومجروحة وقررت إن كل الحب جراح ووجع قلب

عارفين ليه ؟

لأن احتياجنا لنصنا التاني فطرة مش رفاهية

لأن سيدنا آدم استوحش الجنّة حتى خُلقت له حواء من ضلعه وهو نائم

لأن أي حد لما بيحب شكله بيتغير وكيميا جسمه بتتغير - وده كلام طبي - من الراحة والرضا والفرحة

احنا اتخلقنا من جنسين علشان ننجذب لبعض

دي الحقيقة لكل الناس اللي عايزة تدفن راسها في الرمل

لكن الحكاية مش جواز والسلام وضل راجل ولا ضل حيطة ولقب يتغير في البطاقة وفستان فرح وعيال وكلمة عانس تتشال

الحكاية جواز صح يسبب السعد مش الشقا

جواز نكمل بيه مش يقضي علينا

جواز نعيش معاه مش بيه

احنا من غير الجواز - وبتكلم عن البنات والولاد - مش تعساء وضايعيين ومنكسرين ونستاهل الشفقة

خالص

البنت اللي مش متجوزة حرة أكتر وممكن تنبسط مع اصحابها وتحقق نفسها في شغلها وتكون لها هواية رائعة

لكن بتفضل حتة في قلبها مقفولة وحزينة .. منتظرة اهتمام خاص وعاطفة جميلة وتدليل

والولد الأعزب بيخرج ويتفسح وحر وفوضوي وعايش حياته وبيصرف فلوسه ويشتغل بس بيفضل في حياته حتة ناقصة مستني بنت تكملها

..

فيه فرق بين إنك تتجوز وخلاص عشان المجتمع وسنة الحياة وكده "وإن كان ده مشروع ومستحب"

وإنك تتجوز لسبب ويكون جوازك وسيلة مش هدف وتتجوز حد بعينه

..

لما بييجوا يدعوا لاتنين متجوزين أو مخطوبين بيقولوا لهم ربنا يسعدكم .. فوجود روح أخرى بجانب روحك سبب قوي في السعد في الدنيا وحتى في الآخرة

..

لو كان الجواز شئ تافه مكانش بقى فيه جواز في الآخرة

..

قالولي كتير بتتكلمي عن الحب والجواز والحاجات دي

أنا باتكلم في كل شئ

حب وجواز وتقوى وفلسفة وأدب

..

كون إني رومانسية حبة زيادة

أو فيه حاجة في حياتي محتاجة وجود حد خاص

أو إني حساسة فإحساسي أعلى من غيري

أو بحب أعبر عن اللي جوايا زي ماهو طالما في حدود الدين والخلق

دي طبيعتي ومش حغيرها .. أنا كده حتى لو ده بعض الناس شايفينه عيب

دي أنا

..

وجود شريك للحياة مهم اوي
بس مش اهم حاجة
مهم لما يبقى صح
ومهم لما يضيف للحياة

..

اللي يتابع مدونتي من الاول أو على مدار كذا شهر

ممكن يلاقي في فترات موضوعات كتير بتصب في قالب واحد

ده عادي لما تكون مشغول في وقت معين بحاجة معينة أو محتاجها

..

لو كان الجواز هو اللي شاغلني كنت اتجوزت من زمان

ولو لم أجد اللي بادور عليه في الدنيا ممكن جدا أعيش من غيره

ضل الحيطة كتير بيكون أفضل من وجود غير موجود

الحب والارتباط جزء مهم من الحياة بس من غيره مش حنموت

وانا عايشة أهه .. كوني باعبر عن إحساسي حتى في لحظات الألم فانا عايشة برضه

ياريت منضحكش على نفسنا.. كلنا هذا الرجل وإن لم نقل وإن قلنا العكس

أنا شجاعة في تعبيري عن مشاعري - في مساحة خاصة الغرض منها التعبير أصلا - وإلا لو كنت شيفاها ضعف كنت داريتها أو اداريت منها

..

ده مجرد توضيح لناس فهماني غلط

والناس دي تهمّني

..

إيمان