الحقيقة معرفش
حد حيقرا كلامي ده ولا لأ
بقالي فترة كبيرة مش عارفة اكتب
كل مادخل اكتب حاجة الاقيني جوايا كتير بس مش قادرة اعبر
يمكن عشان لسة بادور عليا
وبالاقي مني شوية ويضيعوا شوية
وبادور عليه هو كمان
ومش لقياه
الدنيا دي غريبة أوي
دلوقتي محدش من صحابي جنبي تقريبا
بعضهم مشغول بحياته والبعض الاخر برضك مشغول بحياته
بس فيه حاجات ربنا بينورهالي
أنا مش محتاجة لحد عشان اكون سعيده واكمل حياتي
ولا محتاج لحد يقويني
الفكرة بس فكرة الونس
بس حتى ده مبقتش بحس بيه مع صحابي
يمكن علشان بقى كل كلامنا عن مشاكل وكآبات
كل ما الوقت بيعدي باعتز بنفسي أكتر
وباتأكد إني صح
حتى لو بعضهم مشافش كده
ومش ندمانة على أي حد وثقت فيه وطلع مش قد ثقتي
لأنه هو اللي مش قدها
الفكرة بس ان نضارتي باقت انقى
وقلبي كمان بقى عنده قرون استشعار
بس انا عايزة الناس تسيبني في حالي
مالهمش دعوة بيا
يبطلوا يضايقوني
ولا ميبطلوش طظ
المهم انا عايزة ايه ورايحة فين
حتى لو اتوبيسي مفيهوش غيري
برضه حكمل
فيه شاب من شركة فودافون مات
عرفت من ناس صحابي هناك
قلبي اتوجع اوي وحطيت روحي مكانه
حسيت ان الحياة دي ولا حاجة
ولا تستحق ثانية زعل
وكل شئ مقدر بأمر الله وحده
الناس دي صعبانة عليا اوي
الناس اللي بتستمد قيمتها من كرسي ولا عيلة ولا فلوس
وبتقلل من قيمة غيرها
منكرش انهم بيضايقوني
بس بيصعبوا عليا
عايزة اجيب موبايل جديد
جايز ده يخفف من روتين الحياة
نفسي ف شوية بهجة بس منين اجيبهم
نفسي اقول للناس اللي بحبهم
انهم وحشوني بجد
وعايزة اقول لنفسي
عيشي
No comments:
Post a Comment