أعمل أيه يارب في قلبي .. معرفش جايب منين صبر يشيل كل الحزن والفرحة والحب دول !!.. وكل ما أقول خلاص بقى حيقع ألاقيه قام تاني بكل اليأس وبكل الأمل .. وأضحك بصوت عالي بكل طاقتي كأني خايفه لاصوت ضحكتي يتكتم في يوم .. واعيط من قلبي وكل ما القاني مش قادرة اعيط اخاف العياط يخنق روحي ف يوم فيتخلص قلبي من كل الحزن والحب والفرحة دول !!.. أنا مليش دعوة .. عايزة حد يعملي اللي انا عيزاه اللي هو انا اصلا مش عارفاه .. حطق يارب .. مبقتش قادرة اشاور على كل الحاجات اللي وجعاني .. كفاية بقى .. ما كل اللي بيحبوني عارفينها .. ولا قادرة اعيط قدام حد .. ولا خايفه أمشي على كوبري قصر النيل لوحدي .. رغم انه كان الوقت مش بدري .. وكل اللي كانوا ماشيين عليه شباب .. بس انا فعلا مش خايفه .. مشيت اتكلم مع ربنا .. وابص ع النيل .. وواخدة الدنيا اللي مزعلاني في حضني .. ولو كان الوقت بدري كنت خدته رايح جاي مرتين كمان .. بس عشان كل الحاجات المتخلفة اللي عندنا منفعش .. ومبخافش اتكلم مع أي حد اعرفه .. مبخافش اتعرف على حد معرفوش .. تقريبا بقى عندي حصانة كافية من الحاجات دي .. وحساسية زيادة أوي من الناس المقربين .. حاسة انه قلبي بلتة ألوان اتحطت عليها كل الدرجات اللي في الدنيا .. أنا زعلانة من الدنيا أوي يا رب:(
1 comment:
لأ متزعليش واوعى تزعلى دايما الدنيا مش بتدى كل حاجة يا ايمان وعارفه انى مقصره معاكى الفترة اللى فاتت بس لازم تسامحينى عشان احنا اخوات فى ربنا وبنحب بعض
بس لازم تعرفى حاجة كل اللى بتحبيهم وبيحبوكى مهما كانت درجة الحب مفيش حاجة كامله الكمال لله وحده لازم نتأقلم على كدة بلاش احاسب اللى قدامى لأنه ممكن يحاسبنى بحاجة توجعنى فى بلاش عتاب ولا حساب وبلاش حساسيه زيادة عشان دية بتكون حاجز
اعملى اللى انتى عايزاه مدام فى حدود اللياقه والادب اتمشى على الكوبرى وحطى الهيد فون فى ودانك واسمعى اغنيه بتحبيها وغنى وياها فى سرك وبلاش كوبرى قصر النيل يا سيتى خليكى فى كوبرى الاوبرا اروق واهدأ كتيييير طبعا انتى طقيتى منى دلوقت فا بقول نكمل كرمنا فيس تو فيس احسن
Post a Comment