بداياتكِ غريبة بس انا عاملة نفسي مش واخدة بالي
عشان عارفة انك حتتظبطي قريب جدا بفضل الله تعالى
أصل انا مقولتلكيش
أنا بحب ربنا أوي
أينعم كتير مش بسمع كلامه
بس باحاول
وبارجع
وبحبه
وبكون
وحكون
عشانه عز وجل
عشان مينفعش اكتئب وهو ربّي
أينعم عندي حبة حزن
وحبة اكتئاب
وحبة يأس
وحبة نفسنه اني حكمل 26 سنة بحالهم
بس عندي رضا كبير أوي
ومش حقع
وحقاوم لآخر نفس
ف النص ممكن استسلم للذة الاستسلام
بس حقوم تاني
وقابعة في حضن رحمة ربنا
:)
ومتونسة بيه
وإن شاء الله داخلة جنته في مرتبة عليا
ربنا في قلبي أوي
..
اللي انت عايزه يارب انا عيزاه كمان
وانا كيف مارايدني حكون
عيني أنا غلبانة .. عين إنسان
وانت اللي قيوم ع السما والكون
وانا شايفه طول ضلّي كده بالكاد
وانت اللي عالم كل طعم ولون
يارب سيّرني فـ إرادتك
واطلق إرادتي ف نور رضاك
خليني أشوف من رحمتك
يسّر حياتي في سكّتك
أنا بحبك يا إلهي بس
كانت نفسي عايزه اللي انت مش عايزه
-زمان-
فاخترت نفسي
ورجعت تاني للي انت عايزه
انا عارفه اني لو حكون اللي انت عايزه
حتكونلي فوق مابعوز كمان
..
إيمان الميهي
أو
بيبو
No comments:
Post a Comment