أنا قلبي طفل واخد على خاطره من الدنيا قوي
علشان بتيجي كتير عليه كده بالقوي
معرفش ليه اخواتي الكبار بيفكّروني زيّهم
ويشيلوني حمل قاطم ضهرهم
ويفكروني واد خلاصة وفهلوي
وأنا مش أوي
...
نفسي أجمّع بالونات كل العيال
وانفّخهم أنا
على كل بلونة حدوّن أمنيات
مش حنسى أحط فيونكة حمرا فوق بلالين البنات
وياريت صبي القهوة يسيبلي جردله
علشان ارشرش فرحة من وقت الشروق
ولحد ما الخوف ينطوي
...
واصحي كل جيراننا من فوق السرير
خالتي سعاد حبوسها بوسة كبيرة خالص
عمو بهاء يفضل يزغزغني لحد ما افط أطير
وحروح لطنط أم ابتهال
حعمل شويتين بكّش زي العيال
علشان توافق إني أدي سميرة توكة ملونّة
أنا أه صغير بس أجدع طفل شاله حينّا
وسميرة بنت حتتي
وبخاف عليها زي أختي وصحبتي
واتغاظ إذا هزر معاها أي واحد مـ الكبار
مانا برضه راجل .. مش هزار
...
أنا قلبي طفل بس فاهم زيّهم
وسريع بكاه
وده مش معناه إني صغير
ده البكا فـ الخوف ونس
والحضن ساعة الموت نجاة
فسيبوني أبكي لو بكيت
ساعة ما أحبّ
وسيبوني أغني غنوة نونو مدندنة
وسيبوني أدعي ربنا بطريقتي أنا
وهموم حياتكم دي عيشوها لوحدكم
أنا عمري راجل زيّكم
لكنّ قلبي طفل حابب دهشته
رافض يعيش خوفه وأشجع منكم
..
إيمان الميهي
23-11-2009
No comments:
Post a Comment