ممكن احكيلك حاجة ؟؟

انا عايزة ايه بالظبط ؟؟
سؤال سألته لنفسي كتير أوي الأيام دي .. الأيام الطويلة جدا الغريبة جدا
وانا حد مختلف
أروح ألبس ألاقيني بختار لبس بسيط أوي ومش أنيق لسببين ظننتهما حقيقية
واحد/ إنه محدش واخد باله
اتنين/ إني أكون على طبيعي "الحلوة"
وانا عارفة اني على طبيعتي أحلى من كل حاجة في الحياة
........
الموبايل
بقى من أكتر الأشياء المزعجة في الحياة فعلا رغم انه مبيرنش بس أول مابيرن بشوف مين كده واعمله سيلانت ثواني وبعدين ارد .. بحس اني دايما مش حعرف ارد .. واني ممكن اثور ع اللي بيتكلم .. أو يمكن اتضايق
الناس اللي بتكلمني بجد حبايبي قليلا ما بيكلمني حد مزعج .. غالبا يا إما أصدقائي أو ناس في معزة اخواتي بالظبط وباتفائل بيهم
بس برضه فيه حاجة غلط
نفسي استغنى عن الموبايل والفيسبوك .. حاسة انهم ملهمش داعي حقيقي ..
واروح اقعد قعدة بنات حلوة من بتوع زمان
:)
.........
أنا
حد رائع وبحبني أوي
........
في شقة مصر الجديدة
متخيلتش انه الفيلم ممكن يغير مودي كده .. رغم اني شايفه انه يشبهني بنسبة ما بتزيد وبتقل .. لكن يظل إعجابي بالفكرة واللبس .. وطريقة التعبير عن الحب من غير كلام اللي تشبهني بالظبط .. وردود أفعال غادة عادل اللي نوعا ما شبهي .. والشاب الجان خالد أبو النجا :)) وقعدة البنات .. والحاجات الصغيرة أوي اللي ممكن تخلي الواحد طاير من السعادة .. وقصة الحب اللي نهايتها لسة مش معروفة .. والأمل اللي بيأكد إن في الحياة رغم تعبها ما يستحق أن تعيش من أجله..
..........
القراية
مبقاش ليا أي خلق عليها خالص خالص خالص .. وده مضايقني .. لأنها ضيقت عنيا أوي ومدى بصري
.......
ربنا
باحبه جدا .. هو ملجئي الوحيد
.....
صحابي
بيحبوني بجد .. أنا عارفه .. وعارفة انهم بيدعوا لي .. بس يمكن معتمدين عليا إني اشيل همومي اليومية لوحدي
......
ناس تانية بتظهر في الحياة
فيه بنبونات بتظهر في الحياة .. ناس سكر كده .. بنات وولاد .. باحسهم اخواتي الصغيرين لأنه كلهم اصغر مني .. ولو حد منهم بيقرا دلوقتي حيعرف نفسه .. الناس دول عاملين زي قطرات من المطر وهي الشمس طالعة .. يعني قطرات قوس قزح .. وقتها قليل بس أثرها بيفضل في الروح
.......
هو بقى
على بالي أوي إني لما اقابله أغنيله بصوت عالي على البحر .. وفي غابة مليانة شجر .. واحكيله عن تفاصيل تفاصيل تفاصيل الحاجات اللي بحبها زي الفيونكات .. وذكرياتي مع صحابي .. وأيام المدرسة .. وبابا .. وأحلامي .. وكل الحاجة اللي اتمنتها واللي خفت منها واللي فرحت بيها واللي خفت عليها .. واقعد اعيط أوي أوي واحكي عن اللي واجعني .. ويمسح دموعي وهو عايز يسمع مني كمان ويوعدني بدنيا محدش خطاها قبلي .. دنيا لينا لوحدنا .. واضحك زي الطفلة الصغيرة لما بباها يلعب معاها .. واجري واعمل حركات مجنونة .. عملتها وانا صغيرة .. ويتجنن معايا ويحبني أكتر .. ويعرف اللي انا محتاجاه من غير ما اطلبه .. ونقعد نلعب ألعاب نخترعها .. وكأن الدنيا بتاعتنا والوقت مش حيخلص
......
أفرد شعري ومش مهم الهوا ينكشه حساويه بإيدي .. وأوسخ هدومي بالتراب ومش مهم شكلها حستمتع .. واضحك بصوت عالي أوي ومش مهم الناس ?? حتشاركني .. واعمل اللي يبسطني وأعيش أنا

زي كل الناس قبل ما تتقيد بكلام الناس

زي كل الناس وهو مش خايفه غير من ربنا

زي كل الناس وهي زي ماربنا خلقها

بصمة مميزة وجميلة
.......
النوم
مبقتش عايزة أنام خالص .. كأني لو نمت الوقت حيخلص والعمر حيجري .. عايزة أفضل صاحيه .. على طول
......
الدنيا

صغرت أوي وباقت جهاز الكمبيوتر بتاعي .. بس أنا واثقة إنها قريب جدا حتكبر تاني أوي للاحدود عشان محدش بيعيش وهو بيتنفس جوه قبره
يا إما يعيش بجد .. يا إما حيموت من قلة الأوكسجين

...

إيمان في لحظة حلوة
شكر خاص أوي لريهام الجميلة صاحبة مدونة على بالي
http://reham-3alabaly.blogspot.com/
شجعتني من غير ماتقصد إني ارجع اكتب عني من جوه تاني
:))