مندهشة جدا جدا .. الناس قلبت على منتخب مصر ف أقل من لحظة .. لمجرد خسارة ماتش مهما كانت أهميته .. الناس كانت بتطير بيهم لأي هدف دلوقتي خلاص باقوا سيئين !! .. ومحدش سأل نفسه لو كان مكان أي لاعب و ملعبش كويس .. كان يحب ده .. الحقيقة أنا مندهشة .. من باب أولى إنه أحب واحد فرحني فـ يوم .. فاغفر له لو يوم زعلني .. وبعدين اللي مخلي الناس ثايرة أوي كده .. إنه تقريبا مفيش أي إنجاز غير في الكورة .. حياتنا كلها أو أغلبها انهزام .. فاحنا بنتشطر عليهم .. وخلاص كرهنا مصر ومنتخب مصر !! .. بجد انا مستاءة .. امبارح كنت باتفرج ع البيت بيتك بس من الاخر فمفهمتش الاتهامات اللي اتوجهت للاعبين .. انهرده الصبح بكلم أمل صحبتي - وهي كروية صميمة - لقتها متضايقة من ده باحسبها من النتيجة لقيتها من الكلام اللي اتقال .. عملت سيرش ع النت ودمي اتحرق بصراحة إلى أقصى درجة .. لأنه كله كوم .. وشرف الناس كوم تاني خالص .. حتى عند الله سبحانه وتعالى .. لو واحد شهد على واقعة زنا حتى لو كان في تقوى عمر بن الخطاب رضي الله عنه .. لا تؤخذ بشهادته .. لازم أربع شهود و شروط أخرى لا مجال لذكرها الآن .. يبقى نشهر بالناس بجد انا مش مستوعبة .. الأعراض باقت لعبة في كل حتة لأنه مبقلهاش تمن أصلا .. ربنا يستر على البلاء اللي ربنا بيجيبه لنا من كثرة إعلان الفواحش مش عملها لأنه فيه حديث ما معناه إنه إذا أعلن عن الفاحشة فانتظروا البلاء .. والناس رايحة جاية تتكلم عن بعضها في أدق مسائل الشرف .. بجد لا تعليق .. مقصود كلامي إنه حتى لو عمرو أديب شاف محضر أو غيره وشك ف ده .. فلا يمكن إعلان ده بدون دليل .. والدليل إنه يكون شاف بعينه ومعاه 3 كمان زي ما خالق الكون أمرنا .. وبجد أنا مفهمتش يعني ايه واحد بره راسة منكسة عشان مصر خسرت ماتش .. الاولى بيه انه يرفع راسه لفوزه هو في حياته .. جميل أوي انه مصر تتجمع على حاجة .. وفرحة الكورة كبيرة جدا .. بس مينفعش تكون هي الوحيدة .. زائد إنه الإعلامي حسب دراستي للإعلام يجب أن يكون محايد مينفعش يفقد أعصابه .. اشمعنى مبيفقدش البعض أعصابه أمام مغنية مغرية .. رأي الإعلامي لنفسه .. من المعروف في علم النفس أن الرجل يحب الانتصارات وهو يشعر بها في ماتشات الكورة لأنه مش بيحققها بالقدر المرضي له في الحياة .. وانا مبحترمش أي شخص يتكلم في شرف أي شخص حتى لو كان شاكك فالأولى الستر .. وبجد حرام اللاعيبة اللي بتحرق نفسها عشان ترفع اسم مصر تاخد بالجزم عشان أخفقوا في مباراة ويقذفوا في أعراضهم .. الاولى بينا نمنع ده في حتت تانية كتير معلنة برضه .. و محمد أبو تريكة اللاعب اللي كل الناس بتحبه من قلوبها شهد بالله انه ده محصلش و زيدان حاول يتكلم بشكل منطقي .. بجد أنا مش فاهمة اللي بيحصل .. وبعض الناس اللي اتصلت بالبرنامج كأنه منصب نفسه حاكم على ناس عمره ما شافهم .. كأن عليهم مسئولية نصره كلها .. كانهم المفروض يكسبوا دايما واللعب مكسب وخسارة أساسا .. بجد أنا مستاءة مش بس من الاتهام .. بس من موقف عدم المساندة مهما كان الماتش سئ .. سبحان الله كأننا بنطبق المثل اللي بيقول : معاهم معاهم عليهم عليهم .. كويسين وفايزين تحيا المنتخب .. خسروا يبقوا يولعوا بجاز .. ده مش منطق حد .. هما بشر زينا .. وربنا يكرمهم يارب ويظهر حقوقهم ويكرمهم بالفوز في كأس العالم وياريت لو بنحب مصر أوي كده ننصرها بجد في حاجات تانية .. وننضفها على كل المستويات .. ونتكلم عنها كويس .. ومنهجش منها ونلعن فيها .. نحبها بجد بقى ونعتز بيها .. و منتجاهلش فوزها في مجالات تانية ونفتكر انه على المرء أن يسعى وليس عليه إدراك النجاح .. و منحطش خيبتنا على شماعة الفريق القومي وكل واحد يسأل نفسه هو عمل ايه ف حياته لمصر ؟؟ ؟؟
واتقوا الله
كل تحية لكل لاعب في المنتخب
إيمان الميهي
واتقوا الله
كل تحية لكل لاعب في المنتخب
إيمان الميهي
No comments:
Post a Comment