لهذه الأسباب أحقد على الرجال :)

1- يقدر يقعد على أي قهوة تقابله لو مفيش ف جيبه غير اتنين جنيه

2- ممكن يسهر بره البيت براحته ويرجع حتى وش الفجر ويرجع كمان يلاقي مامته مستنياه بابتسامة عشان تعشيه

3- ممكن يتمشى ف أي وقت أو مكان يعجبوه من غير ما يتقال عليه كلام يسئ لسمعته أو يتعرض لأي مضايقات

4- من غير مايتكسف ممكن بسهولة يعترف للبنت اللي بيحبها إنه بيحبها

5- ممكن يكون مدخن من غير ما يتقال عليه منحرف

6- ممكن يسافر كام يوم في أي حتة لوحده ويقعد في أي مكان ويروح في سابع نومة من غير أي قلق

7- يقدر يصلي في أي مكان

8- ممكن ينام في أي جنينه ويتفرج على منظر السما براحته

9- ممكن يلبس دبلة لو مش خاطب من غير ماحد يقوله حيتوقف حالك

10- ممكن وهو عنده حتى 40 سنة يتجوز وهو بيقول كنت باكون نفسي

11- يقدر يخطب كذا مرة ويفك طالما ملقاش الإنسانة المناسبة من غير ما يتقال عليه كلام مش كويس

12- ينفع تكون مناخيره كبيره من غير مايكون ده فيه تشويه لجماله .. ده ممكن يكون شكله وحش أصلا والبنات حتتهبل عليه

13- يقدر يحط برفيوم وهو خارج

14- يقدر يغني للي بيحبها في الشارع

15- ممكن يمشي ببوكيه ورد كبير من غير ما يتعاكس

16- يقدر يلبس في الصيف بنص كم

وشورت كمان لو يحب

17- يقدر يعاكس أي بنوتة حلوة بصوت عالي

18- ينفع يكون راجل اخر شياكه مجرد ما يلبس بدلة وهو في الأساس مش كده خااااااالص

19- لو افترضنا وواحدة عبرته وعاكسته حيتقال عليها هي قليلة الأدب ومحدش حيقول عليه حاجة حتى لو كان هو اللي دفعها لكده

20- مش حيقف قدام المراية ساعة يلبس ويقلع ويغير ويشوف .. هما أساسا تيشرتين وبنطلون جينز

21- مش حيضطر يلبس بكعب عالي وضهره ينقطم

22- مش محتاج يعمل شعره عند الكوافير بالشئ الفلاني .. ده أساسا حيترحم من مصاريف الكوافير ومسلتزمات الجمال اللي بتكلف كتيييييييير .. ديتها الحلاق جارهم أو ممكن بباه يحلق له.. ويا سلام لو أقرع يبقى جاب م الاخر

23- مش محتاج يشيل شنطة كبيرة مليانة حاجات .. محفظة واحدة تكفي

24- مش بيتعب في حمل و وضع وتربيه ... إلخ .. هو آخره يلاعب البيبي \ولما يكبر يشخط فيه

25-لو قال أي لفظ خارج محدش حيقول عليه سافل .. الناس حتقول ده صاحب خبرات أو مضغوط يااااحرام

26- لو بص على واحدة مش محترمة ف الشارع الناس حتقول معذور "ماهو أصله مسلوب الإرادة "

27- لو كان متجوز 6 مرات قبل كده مفيش مشكلة إنه يتجوز آنسة لم يسبق لها الزواج

28- ولو اتجوز على مراته الناس حتجيب العيب عليها

29- لو ساب بيته وطفش الناس حتقول الأم تعشش والأب يطفش

30- لو كان منحرف فعلا .. الناس حتقول طيش شباب

حسبيّ الله ونعم الوكيل

منقول مما أراه وأسمعه وأقرؤه وأستوعبه

إيمان