بقالي فترة عايزة اشتري ساعة وبمواصفات معينة .. وكنت متوقعة تيجيلي هدية في عيد ميلادي بس مجتش .. مش لاقية بقى المواصفات المعينة دي ف أي ساعة باشوفها في المحلات .. فيما يبدو اني محتاجة أدور وأدعبس ..لأن الساعة من الحاجات اللي بعتبرها حميمة جدا عليا جدا .. وبرتبط بيها .. ومن هنا أناشد كل صديقاتي ياريت تجمعوا مع بعضكن وتعملوا جمعية كبيرة وتجيبوا لي ساعة بنت ناس :).....امممممم.. موافقة بالإجماع .
بعض المشاكل عندي بتحصل بسبب حاجتين.. إما إني اتأخرت على فعل معين أو استعجلت عليه .. لأن الناس الحساسين زيادة - زيي - مش بيعرفوا يختاروا الوقت المناسب غالبا .. وعلى هذا فإما الرز يشيط أو يطلع ربع سوى .. بس انا مش متضايقة لأني باتعلم مع الوقت والتجارب والتكرار إمتى الوقت المناسب تحديدا .. وإمتى أبادر .. وإمتى أنتظر .. ومفيش حد اتولد عالم .
من فترة كده بصيت في نتيجة الموبايل .. وبدأت أقدم الزمن وأأخر الزمن 20 سنة قدام و30 سنة ورا .. الأيام بتجري .. وبدأت أحس بقيمة الزمن .. واللي عدى عدى ف أيه .. واللي جاي .. ومفيش حاجة بتحصل مصادفة .. وإني حتى لو مليش نفس للحاجة .. لازم تتعمل .. علشان ميفوتش وقتها أو يتأخر .. وبالمناسبة بقى .. فيه حاجات كتير بتيجي بعد فوات الأوان .. بس الحقيقة إن ربنا بيدي لنا كل حاجة في وقتها الصح .. أما الفرص اللي ضاعت فاحنا اللي ضيعناها بس برضه قدر .. أعتقد إني بعد سنتين من دلوقتي حكون حاجة مختلفة .. غالبا حياخدني تيار الحياة على أجمل جزيرة متخيلتش إنها موجودة أصلا .. أكيد برضه فيه حاجات حتروح .. بس المؤكد إنه الأصلي حيفضل أصلي .. ويبقى مهما طال العمر .. ومهما جدت الأحداث وحتى إذا بقى لي 100 حفيد حفضل برضه إيمان :) بكل تواضع ..ومفروض أعمل حساب الآخرة أكتر من كده .. أدي فرصتي/ الحياة بس هي مرة واحدة بس .. لو مت ابقوا ادعوا لي أدخل الجنة.ومما هو جدير بالذكر إني ارتحت كتير بعدما طلعوا الكلمتين دول .. :) تسلمي ياكي بورد ويا مدونة .
1 comment:
ايه يا بنتى المنبهات دية كلها ده انا كلى اتنبيه حاد على الصور دية هاههههههههههههههههههههههههههههههههههههههههههههههههههههه
بخصوص الساعه حلو اوى الاعلان ده انتى عارفه اننا منقدرش نتاخر عنك عموما حاضر يا سيتى ان شاء الله عيد الميلاد القادم نكون عملنا الجمعيه وتكون انتى اللى تقبضيها الاول شفتى بقى احنا كرما وياكى ازاى
وبخصوص بقى السنين والجزيرة والحاجت دية انا اتوقع انك بعد مليون سنه مش مية بس ان ايمان هتفضل ايمان بطبيتها وقلبها الكبير وحنيتها وكل حاجة
وقلبها يساعى لكل الناس وكل الدنيا
ربنا يخليكى ويسعدك ويحقكلك كل ما تتمنيه يا اختى
Post a Comment