كيك بالبرتقان

بسم الله الرحمن الرحيم
والصلاة و السلام على أشرف الخلق أجمعين
إزيكم جميعا ؟
يا رب تكونوا بخير
البوست ده كده حساه بوست صيفي مسائي .. جو الفضفضة الممزوج بالتأمل والشجن على شويتين تهريج

كل واحد يشد كرسي و هاتوا كباياتكو و تعالوا نحكي سوا " بتشديد الكاف "

الناس اللي زي حالاتي لسة بيتعرفوا ع الدنيا وبيحاولوا يشوفوا النصين الفاضي والمليان من مج الحياة الشفاف

فيه فكرة حلوة لما تأملتها بجد حسيت بحاجة جوايا اختلفت

أنا ف العادي بتاعي باتعامل مع الحياة على أعصابي جدا .. ولكو أن تتخيلوا .. ومن فترة كده أخدت نهج التجارب .. بقيت باجرب أساليب مختلفة في التعامل مع الحياة و البشر .. وباحاول أظبط التجارب دي عشان تتماشى مع مبادئي ف الحياة .. أوقات باكون مرنة وساعات باكون جامدة .. على حسب .. بعد ما تميت 23 سنة حسيت إني كبرت بجد .. وكل يوم بيمر لازم أكون أنضج .. والحقيقة تجارب حياتي هي اللي خدت لي القرار ده .. مع كل ألم الواحد بيكون أنضج و مع كل حاجة جديدة بنتعلمها بنتعرف أكتر ع الوجه الحقيقي للحياة

بعد ما خرجت أول مرة من فيلم آسف على الإزعاج .. حسيت بوجع جوايا .. حسيت إنه الفيلم بيمسني في حاجة .. رغم إني ظروفي مختلفة تماما عن الفيلم .. بس جت في دماغي فكرة واحدة بعيدة .. حسيت إنه على ما فيه ناس وحشين .. لسة فيه نور ..

الفترة اللي فاتت ~أو بمعنى أدق الأيام اللي فاتت كنت حاسة بمشاعر سلبية جدا .. يمكن أبرزها الوحدة الشديدة .. الوحدة بمعنى إنك متكونش متونس لدرجة الذروة بشخص .. إحساس ضايقني وحسيت إنه مفيش أتعس مني في الكون لحد ما قابلت حاجة .. هي بنوتة ظروفها غريبة شوية أو غريبة جدا .. أول ما قلبي سمعها جت على بالي مقولة أحمد رفعت ربنا يكرمه .. ابتسم فهناك من هو أتعس منك .. ربنا يقويها يا رب و يسعدها قد ما شافت غلب بضم الغين .. وبالمناسبة أحمد رفعت من البني آدمين اللي تحط قدامهم علامة تعجب كبيرة و تكتب قبلها هو لسة فيه ناس في الدنيا كده

أيوة .. الدنيا لسه بخير يا بشر وفيه ناس بتعمل الخير لوجه الله

المهم أرجع بقى للحاجة اللي اختلفت جوايا لما حسيت بالفكرة الحلوة .. فكرة إنه الدنيا مش نهاية المطاف .. وإني مفروض ماخافشي من الموت واعمل حسابه .. الدنيا دي كوبري .. محطات مترو .. المقسوم فيها بنشوفه .. والباقي كله والنعيم الدائم في الجنة إن شاء الله .. أنا نفسي أدخل الجنة .. بس ربنا اختار لي إني أعدي ع الكوبري ده .. وماله .. كله وقت ويعدي واروح لمكان أجمل وأسعد واشوف ناس أنقى وأطهر يا رب وكلكم

انهرده حصلت كمان حاجة .. واجهت موقف محرج شوية بالنسبة لي بس كان لازم يحصل .. ده كان ف الفترة دي حاجة مهمة عشان اتظبط

ولقيت كمان حاجة .. أنا مش لوحدي .. كل الناس بتظبط نفسها مع الوقت .. ده شئ طمني إني طبيعية :)

فاضل شوية و أكمل 25 سنة .. حساه رقم جامد .. وحاسة إني كبرت مش هزار .. بس باقول لنفسي .. متكبريش الموضوع يا إيمي كلها ربع قرن .. وعموما لسة فاضل كام أسبوع أنا لحد دلوقتي 24 ربيعا

الحمدلله على أبويا الله يرحمه و أمي ربنا يخليها لي وأختي ربنا يسعدها .. بجد دي نعمة أنا مكنتش ملتفتة ليها .. نفس إحساسك لما تسمع كلمة لبن وعسل .. اللهم دمها نعمة واحفظها من الزوال

فيه حاجة كمان .. عارف لما تكون بتلف حوالين نفسك و فجأة تلاقي نفسك .. لو حسيت بكده إوعى تخلي الإحساس ده يضيع من إيديك

في النهاية عايزة اقول ما شاء الله لاقوة إلا بالله عشان خايفة أحسد نفسي وخايفة حد يحسدني

الحياة مبقتش سعيدة ولا تشبه لأحلامي من قريب ولا بعيد .. بس انا رضيت أكتر عنها

وبجد ربنا يخلي لي كل قلب حبني بصدق وبفعل

أما عن علاقة الكيك بالبرتقان بكل ده .. فأنا دلوقتي باكل كيك بقطع البرتقان اللذيذة جدا .. ومش عارفة أقاوم إنعاشه ليا .. وباسمع نانسي عجرم الألبوم الجديد

النعم زي الكيك بالبرتقان واللحظات السعيدة زي قطع البرتقان اللذيذة اللي بنلاقيها ف قلب الكيك

أسيبكو بقى واروح أخد حتة كيك كمان

.......

كانت معكم من أمام الطبق الفاضي

إيمان - هانم - الميهي

محبتي