انهرده ححكي لكو عن حاجة ناس كتير متعرفهاش ويمكن متتخيلهاش عني .. زمان كان نفسي أكون نجمة .. أطلع في التليفزيون و اقف ع المسرح .. وفعلا وانا طفلة سعيت لده وسجلت حاجات - على قدي - في الراديو و حاجات كده .. وكان نفسي أكون مع صفاء أبو السعود في أغاني الأطفال .. هما في الظلام بس ده كان حلمي وقتها .. بس توقف الموضوع عشان لما بدأت أدخل في الموضوع ده أنا وأهلي وسألنا وشوفنا وكده .. لقيناه أو بالأصح لقوه وسط منفتح بزيادة أوي فخافوا عليا جدا .. وتوقف الموضوع .. وقتها مستوعبتش أي حاجة و قعدت فترة كبيرة جدا متأزمة كل ما تيجي حفلة في التليفزيون و اتخيل اني كان ممكن اكون مكان اللي ع المسرح كده .. ولدلوقتي لما باشوف برامج مع نجوم باتخيل نفسي فورا بيجرى معايا حوارهم .. وياترى كنت حجاوب ازاي .. وكان جمهوري حيتقبل ده ولا لأ .. وقعدت افكر يا ترى أنا ليه باحب ده ؟؟ .. معرفتش الإجابة بدقة .. لكن أنا شفت في نفسي أغلب مقومات النجومية و الأضواء .. يعني .. باكون على طبيعتي جدا وانا بالقي قصيدة أو باقدم حاجة ع المسرح .. بانطلق وبابقى جريئة أكتر كتيييير من لو قلتها بيني وبين مجموعة ناس .. ع المسرح الموضوع مختلف .. وانا باحب ده جدااا .. ومجرد ما بينتهي الكلام باتكسف جدا لما الجمهور بيحييني أو باسمع كلمات إعجاب .. يعني كأني بدخل دنيتي وبخرج منها .. يمكن ده علشان من وانا طفلة اتعودت اتكلم في المايك قدام عدد كبير من الناس سواءا في المدرسة أو في حفلات المصايف .. فبقى الموضوع أسهل مما يمكن و كذلك قدام كاميرات التليفزيون .. كمان وقت الكلية انا كنت راديو وكنت بانطلق جدااا في الصوت .. وكنت ومازلت باقول أول مابادخل الاستديو باحس إني ملكة في المملكة بتاعتي .. باستخدم إمكانيات الصوت و الإلقاء بشكل شبه كامل .. يمكن الموضوع أسهل كمان من الحاجات اللي وجها لوجه .. كنت أحب يكون لي ناس تعجب باللي باعمله و تحبني وتتابعني وتحب تسلم عليا وتتصور جنبي و تشجعني .. كده يعني .. ويمكن ده بيدي للواحد دعم في حياته يخليه سعيد للحظات .. لسة باشعر بده لما بالقي شعر أو لما باشتغل في البرنامج بتاعي على إذاعة بنات وبس .. بابقي مبسوطة بنفسي ومنطلقة زي ما قلت لكو .. كأني حد جديد ومختلف .. مش عارفة انهي البوست ده ازاي ..يمكن عشان من البوستات القليلة الخاصة أوي ..كل طريق ربنا بينحيه عن الواحد أو بيخلي الإنسان يختاره ويسكله أكيد بيكون خير له .. ومين عارف يمكن الشهرة تفتح لي أبوابها بس أكيد في حاجة مختلفة .. كانت معكم : نجمة شلال العطرإيمان الميهي
No comments:
Post a Comment