مش عارفة اكتب ايه ؟
كنت محضرة كلام كتير من فترة و عاملة له مسودة بس مش عايزة اكتبه .. الحمدلله رب العالمين .. رحمة الله فوق كل شئ .. ممكن اكتب جزء منه ؟؟ ممكن ؟؟
ليه بقيت باحس إنه الدنيا بليل ضيقة و انا لوحدي
ساعات بيجيلنا حلمنا لحد رجلينا بعدما نكون فوقنا
السرطان يا يموتنا ببطء يا نموته احنا ببطء .. ماهو مش حينفع نعيش سوا
سئ إن حد يقنعك إنه الشمس بتطلع بليل .. والأسوأ إنك تقتنع
جربت إحساس إنك تنام خايف حد يفتح عليك الباب .. ويشيل عنك الغطا
جربت إحساس انه مغروس خنجر في صدرك مش قادر تشيله .. وكل شوية يقتحم جسمك .. حتى لو النزيف وقف أو دمك نشف .. المتعب أكتر لما الخنجر ده يتشال و يتحط كذا مرة .. فتروح روحك و تترد و تروح و ترجع مع كل مرة
من فترة كنت زي البلونة اللي على اخرها .. محتاجة اتكلم مع حد .. أي حد معرفوش بس بيحس .. حد يتواصل معايا بس عشان احنا بني آدمين زي بعض
الدنيا برضه مازالت تستحق تتعاش .. لما ابص لنفسي في المراية .. لما بيتجدد حلمي إني أكون ماما في يوم قريب .. يا رب
ملحوظة : اعتذر انه البوست طلع كئيب كده بعد فترة الغياب .. وشكرا لكل اللي سأل عليا وللي مسألش .. وشكرا لتحمل قلوبكم وأرواحكم
No comments:
Post a Comment