هوامش

بسم الله الرحمن الرحيم

وبه نستعين

..
البوست طوييييل .. خلوا معاكو البانادول والاسبرين وكوبايات الشاي والقهوة و الإيشاربات لزوم الصداع

*

أصعب حاجة لما يكون جواك كلام كتير أوي وتلاقي نفسك مش فاهمه وبالتالي مش قادر تعبر .. بتبقى عامل زي الطفل الذي لايملك إلا الصراخ من أي شئ .. لأ لأ .. بتبقى عامل زي المخلوق الذي يعجز عن الكلام وقتها لا أحد يستطيع أن يفهمك أو يشعر بك إلا اثنين .. أمك و صديق حقيقي .

*

الأدب وحشني أوي بجد .. بقيت باتضايق لما حد يقوللي مبقيناش بنشوفك .. وباتضايق أكتر إنه الناس نسيت إني شاعرة عامية .. المصيبة لأكون أنا نسيت .. فين الأدب من أحلامي ؟؟ و قدمت له أيه ؟؟ وياترى هو قدم لي أيه ؟؟ .. جوايا كلام يكتب دواوين لكن حاسة بالإفلاس اللغوي و التصويري .. حد فاهم حاجة ؟؟ أحسن

*

فيه حد من معارفي .. أقدر أقول عليه من الأصحاب بدأ يغير مساره للأحسن - كما أتمنى - الحقيقة مش عارفة .. بس يمكن لما الواحد بيتوجع أوي بيعرف لغات أخرى للحياه كلها .. أتمنى يكون ظني في محله .. يا رب يكون لسه فيه أمل يستحق .. آه نسيت اقولكو محدش يسألني مين الشخص ده لأني مش حقول .. ولو قلت لكو تبقى أيه فايدة الحداقة على رأي ملكة الأنوثة الراقية فاتن حمامة

*

لا .. لن تملّي الانتظار

لن تيأسي ما دام لليوم الذي تحيين غد،

وإذا مللتِ هنيهة طول الفراق .. ففكري دوما بأن لقاءنا

لم يأت بعد!

الرائع نجيب سرور .. من ديوان لزوم ما يلزم

*

بدأت أفكر الناس عايزة تسمع أيه في الفن و الأدب .. لقيت أنه مش كل اللي الناس بتحبه وحش .. أكيد هما متجمعين حوالين س أو ص علشان بيقدم لهم حاجة هما محتاجين لها أو عايشينها .. مهم أوي انك تبقى شبههم .. على فكرة مش كل س أو ص مسف لأ .. مش للدرجة دي .. دلوقتي ناس كتير بتنتقد محمد سعد مثلا و محدش قال حاجة عن فؤاد المهندس في أفلام زمان .. الكل قام على سعد الصغير عشان تلفظ بلفظ الحمار في غنوة ومحدش فاكر إنه شكوكو غنى للحمار وشادية كمان .. وعلى الرغم من اني مبحبش أسمع س ولا ص ولا عمري ممكن أجيبلهم شريط و لا ادخل لهم فيلم وكبيري اشوفهم ساعات ع التليفزيون لو مفيش حاجة غيرهم .. وعلى الرغم إني مبحبش الطريقة اللي بيضحك بيها محمد سعد ولا الطريقة اللي بيؤدي بيها سعد الصغير أو بيغني معرفش ولا الشعبي كله .. لكن ده ميمنعش انهم بيقدموا حاجة لجمهور معين .. السؤال هنا ليه ؟؟ .. الناس محتاجة تضحك ؟؟؟ .. الشباب باقت عايزة الحاجة المباشرة السهلة ؟؟,.. ضغوط المواصلات و الزحمة والحر و الشجارات ع الكبيرة والصغيرة باقت مخلية الناس تبطل تفكر ف حاجة غير همومها ؟؟ .. عايزة الفن والأدب يسلوها بس

دي كلها أسئلة لسة بادور لها على إجابات بس اللي انا عارفاه إنه مش لازم تكون متفزلك عشان تكون مبدع .. يكفيك إنك تكون بسيط عشان تكون مبدع زي الجميلة فاتن حمامة و الرائعة فيروز و الجميل أحمد حلمي .. فالبساطة سر التميز لأنك كل ما كنت بسيط كل ما كنت طبيعي وطبيعتك حتميزك عن غيرك لأنك بالفعل مختلف عن كل بني آدم من يوم الخلق ليوم القيامة

*

ما بيحرّمش

...

مع المونتاج

وبين الكادر والتاني

ماكنش الفاصل المحتوم

ماكنش الفاصل

لما تتصدق عليّا برنة التليفون

فتحدفني ف بحر لُقاك

أغيب واغرق

تفرّق مُعطيات اليوم

على الكادر اللي متزوّق

لآخر لقطة في الكاميرا

يوزّك قلبك المعزوم

على حفلة سمر جرحي

بطرحي م الحياه .. ف تدوم

يدوم عزّك

تفضّل أنتحر جواك

ولا انك ترجع المهزوم

عبير السيد الراوي .. من ديوان نُص روح

*

كله بقى بيمثل على كله .. سوق العمل .. و البيزنس الغير شرعي 100% .. بتروح تعمل مقابلة شخصية .. إمكانياتك 70% ومطلوب منك تقنع اللي بيعمل معاك المقابلة إنك 200% مع إن الوظيفة ممكن تكون محتاجة 60% بس .. لكن تقول أيه .. لازم ترد ردود مثالية و مقولبة .. لازم تلبس شيك .. لازم تؤدي دورك في 15 دقيقة على أكمل وجه .. والطريف إنه اللي بيجري المقابلة أكيد عارف إنه مش كل ده حقيقي لكن الظاهر إنه الناس كلها باقت موهوبة في التمثيل .. كلنا نمثل وكلنا نتفرج .. بدل ما يسألك عن نقاط ضعفك فتقول مثلا مواعيدي مش مظبوطة و هو يساعدك .. لأ لازم تطلع سوبر مان وتقول إني باهتم بشغلي على حساب أهلي و صحابي .. إني باركز في شغلي على حساب صحتي .. إنت بالفعل عندك مقومات و مواهب قد يكون الحضور مثلا مش منها .. لكن لازم تجيده وتعيش في الدور يا معلم

عذرا ولكن القافية حكمت بيا معلم دي

*

(2)

لما الدنيا هاضِّيق بيكي

خشي ف قلبه

واسندي ضهرِك على جدرانه

وحسّي الرعشه

أكيد دلوقتي

بينطق إسمك

عبد الرحمن الخطيب .. من ديوان وجهة نظر .. مقطع من قصيدة : جوّاه

*

مبقيتش الناس بتعرف تفرح ولا تصبر ولا تتعلم ولا تكافح .. حاجات كتير عجزنا عنها .. بقينا تنابلة السلطان وتبّاعه .. المصريين وأنا منهم عندهم كم رهيب من الشماعات منها الظروف والحياة و الهم والضيق والنكد .. إسمع أغاني الميكروباصات للنجوم المجهولين ودي أكتر م الهم ع القلب .. ياه بمناسبة الهم ع القلب .. هو كتير أوي كده .. الناس كلها مجاريح ومظاليم و الدنيا ملطشة معاهم و كأن الحياة دي وسية .. لا إله إلا الله .. حد شاف ظالم وطاغي 100% .. مش ممكن يعني .. زمان كمان كانت الناس بتعرف تفرح .. إن شا الله بلقمة حلوة .. بافتكر دايما حياة سعاد حسني و شكري سرحان في فيلم الزوجة التانية قبل ما يدخل فيها العمده .. كانوا سعدا رغم كل شئ .. ده مش خيال .. دي أكيد حقيقة .. الغرض .. منطلبش سعادة 100% من دنيا مفيهاش سعادة غير 75% مثلا

الكمال غاية لا تدرك

*

إحساس حلو أوي لما تكون فخور بأصدقائك أو معارفك .. إحساس أحلى لما يكونوا هما فخورين بيك

*

كاظم الساهر .. أشرف عبد الباقي .. فيهم ميزة رائعة .. بيعرفوا يدوا فرصة للي قدامهم يتكلم و يعبر عن نفسه وغالبا بيكون اللي قدامهم ده أقل منهم .. الغريب بقى أنه ده بيزود من حضورهم و جاذبيتهم

*

شئ جميل اني ابتسم في وشك عشان ده من الذوق .. شئ سئ اني امثل الابتسامة دي لأني مضطر أو عشان شغلي بيحتم عليا كده أو عشان متشمتش فيا

!!!

*

إحساس حلو أوي لأي بنت إنه يكون عندها بيبي بتاعها .. تحبه وتهتم بيه و تربيه وتهتم بنفسها عشانه

*

هما الستات بجد باقوا وخدين حق الرجالة ؟؟ .. هي نسبة الرجالة الحقيقة باقت كام من نسبة الرجالة المحسوبين على الرجالة .. ولا نسبة البنات الحقيقة باقت نسبة كام من البنات المحسوبين ع البنات

كلمة في أذن كل رجل ( حقيقي ) كل بنت مهما طلعت .. في النهاية .. بنت .. وده تكريم بس محتاج يتفهم

يمكن يتكتب عنه بوست لوحده

*

حبيبي يا مجرم يا سافل يا دون

يا رب السوابق يا رد السجون

رزالتك معاهم ونمك عليهم

دا زائد جنانك ونعم الجنون

جابولي وجابولك وياما يجيبوا لنا

لان البلد دي حاكمها القانون

توقع ما بينى وما بين الحكومه ؟

دي برضك حكومه وأنا إيش أكون

أديك رحت مورته وحتروح بشرطه

وحيفسحوك فى جميع السجون

وأنا مش ح أزورك كما كنت فاهم

ولا كنت فاهم

ولا يحزنون

أحمد فؤاد نجم

القاهرة / 1979

*

لو خُيرت إني اعرف شئ من الغيب أحب اعرف مين حيبكي قلبه عليا بعد موتي

*

حضرت من فترة صغيرة حنة إسلامي .. أغاني إسلامية ومن غير موسيقى .. كانت كلها بنات .. وكانوا لابسين لبس جامد .. وكان فيها رقص و كل حاجة مفرحة .. كل حاجة ف ديننا موجوده

على فكرة انا باسمع موسيقى واغاني بس هي ملحوظة استوقفتني

*

هناك في جملة انه نعيم الدنيا زايل ونعيم الآخرة باقي .. يارب نفتكر

*

عايزة اتعلم السواقة .. بس شايلة أوي هم الخناقات لأني عارفة اني حضطر اتخانق خناقات لا حصر لها .. معرفش ليه الواحد لازم يتعلم قلة الأدب مع تعلمه السواقة .. تلاقي تعليقات سخيفة ولو بينهم وبين نفسهم .. مفيش حد بيسامح ولا بيصبر .. ماشي انه فيه حاجات تستاهل بس برضه فيه حاجات متستاهلش تقف قدامها .. يا خبر ولّا الحقد الطبقي .. شاب صغير راكب عربية فاخرة ب 3000 ج أو اكتر .. تلاقي سواق تاكسي ولا اتوبيس يقولك اه ماهو ابوه جايبها له ماهو مش تعبان زينا .. وانت ماااالك؟؟

محدش سايب حد ف حاله

*

بمناسبة بقى محدش سايب حد ف حاله .. ناس كتير بتبص لرزق غيرها ف أي حاجة .. شغل .. فلوس .. جواز .. صحة .. أي حاجة .. مع إن ربنا العادل هو مقسم الأرزاق ,.., والله محدش واخد غير نصيبه بس نقول أيه .. دنياا

*سواقين الميكروباص ..عاملين أزمة لكل الناس .. اللي ماشيين على رجليهم والركاب وسواقين عربيات الاجرة و الملاكي وكله كله .. بس أكيد مش كلهم وحشين .. أينعم الأجرة غليت أوي ربع جنيه على كل تسعيرة .. و الكراسي مزنقة جنب بعضها و محطوط كنب إضافي .. ويا ويل السواق يا سواد ليله لو زميله خد منه زبون .. وانه لازم يقف يحمل لحد ما الواقفين ميلاقوش مكان يفقوا .. ده غير الألفاظ الساحرة تيت تيت تييييت اللي لازم تسمعها .. ولو مش عاجبك انزل .. والمعاكسات .. وحاجة تنقط .. بس برضه أكيد فيه أمل والحياة لازم تستمر

*

بقيت بانسى اكتب حروف ع الكمبيوتر أو ف الكلام .. ياترى ليه ؟

*

عايزة أجيب سلحفاه ونفسي اتعلم ركوب الخيل و السباحة أعماق

*

عرفت يوم الجمعة اللي فاتت اني لسة باقدر افرح من قلبي .. الحمدلله

*

أكيد جوايا كلام تاني ويمكن أكتر .. بس ده اللي خرج مني

إيمان