تلات بنات في وسط البلد

أولا وقبل ما ابدأ احكي لكو .. أحب أشكر إنسان ما جامد جدا لأنه أثبت لي أن الإنسانية لازالت بداخل الناس رغم كل ما حولنا من محبطات .. لم اكتب اسم هذا الإنسان لأنني أريد له الثواب كاملا .. وأود منكم أن تدعو له بالخير .. رزقه الله من خزائنه التي لاتنفذ

النهرده بقى كان يوم عجيب

من كام سنة اتعرفت على شلة بنوتات من ع النت .. سامعه حد هناك بيقولي : نعم !! ويبدأ في حوار متواصل عن أضرار ده لكن متخافش يا فلان .. البنات دول ولله الحمد بنات رائعين وصحبة حلوة .. كنا في منتدى مجانين معا وقضينا معا عن حق أوقات من أسعد وأصدق الأوقات .. خرجت أنا وهبة اتقابلنا في الأوبرا .. وقعدنا نتكلم في شتى شئون الحياة وبينما كنا زمان بنختلف لكن دلوقتي بقينا اقرب فيما أرى وبجد استمتعت جدا بالحديث معاها .. انا كنت نازلة مهدودة لأسباب كتير بس قلت لايمكن أضيع الخروجة دي .. المهم بعد شوية هدى اتصلت وقالت انها وصلت وقعدت اوصف لها .. أينعم تاهت توهة دلع بس كله شغال .. مش مهم صاحبتنا ونستحملها برضه والله أعلم مين اللي يستحمل مين .. وانا رايحة لها وهي متنرفزة وبافكر اهديها ازاي الاقي الهانم واقفة تصور الأوبرا .. اتخانقنا بهزار كده عشان هدى كانت جاية قافلة وانا كنت عايزة افرفشها .. هدى جت من هنا وانا قلبت معايا تهييس .. قعدنا نتصور صور عبيطة بس جنااان ..هدى بتحب التصوير جدا و أجمل الصور هي اللي صورتها لي .. أنا بافكر أتفق معاها على صور الفرح :).. وقعدنا نغازل الورد اللي شفته مليون مرة واول مرة اخد بالي من تفاصيله .. و طلبت معايا كشري ومحدش يسألني ليه .. اقترحت عليهم ووافقوا .. هبة حبيبتي كانت صايمة وفطرت على كشري .. المهم .. مشينا تلات قطاقيط فوق كوبري قصر النيل لقيناه فااااااااااضي .. ليه بقى .. عشان حرم سيادة الريس كانت حتعدي انهرده .. وعاملين احتفالات وصواريخ و في النيل مراكب بشراع عليها القراءة للجميع وجنينة جنب الاوبرا مزوقينها والقراءة للجميع برضه .. إحساس حلو لما مكان مزدحم تلاقيه فاضي .. مشينا كتيييير وكان الجو والنيل والدنيا تحفة بجد ..واتكلمنا ياه لو نقدر نكون هناك ع الفجر .. أكيد بيبقى رائع بس طبعا ده من رابع المستحيلات .. جينا نعدي شارع التحرير قلت لهبة عايزة اعمل حاجة مجنونة .. قالت لي يللا نعدى وخضتني وانا كنت حعدي فعلا ف وسط العربيات .. اول ما الإشارة وقفت والشارع كان فاضي قلت لها يللا نجري بقى .. قالت لي يا سلام والشارع فاضي هي دي المغامرة .. قلت لها تخيلي انه فيه عربيات اومال الخيال فايدته ايه .. رحنا محل الكشري وطلبت تهييس بالجاامد .. قعدنا كتير هناك وتقريبا الناس عرفونا .. وهدى برضه قعدت تصورنا صور من بتاعتها المفتكسة وطلعت كلها حلوة .. وبعدين جت الساعة 9 قلت لهم يللا يا رجالة عشان نلحق ناكل الايس كريم .. ولا حياة لمن تنادي .. هدى وهبة ريحوا خلاص .. قمنا ورحنا شارع طلعت حرب .. مشينا كتير جدا واحنا مش حاسين بالوقت والشارع كان زحمة اوي اوي .. موصفلكوش بقى النكت والضحك طول الوقت .. كانت ساعة حظ وزي مانتوا عارفين ساعة الحظ بتتكرر كتير .. وخروجات البنات بتبقى حاجة تحفة مش زي ما الولاد بيفكروا انها كآبة .. جبنا الايس كريم وساح واحنا ماشيين وهو بينقط ومناديل ومية و اتلحسونا بس كان جامد .. مشينا ولا دريانين بالدنيا كأننا كلنا ما صدقنا نضحك من قلوبنا بجد .. بابص في الساعة لقتها عشرة إلا تلت .. خير خير .. مشينا نجري بردود أفعال عجيبة لما نتصور اللي منتظرنا في بيوتنا .. بجد ضحكنا أوي و انبسطنا اوي وكنا على طبيعتنا اوي اوي .. أينعم اتأخرنا ع البيت ورجعنا هلكانين بس كله يهون في سبيل الجنان .. بما يرضي الله طبعا.. نسيت اقولكو اني لما جيت اركب عمو العسكري منعني الحق الميني باص أقوله متأخره ع البيت يقولي ده شغل .. حسبي الله ونعم الوكيل .. وقفت كتير لحد ما جه الميني باص اخيرا و من كتر التعب نمت فيه

هدى .. هبه .. انا بجد استمتعت باليوم واتهديت منه وحقيقي ياريت يتكرر تاني

ربنا يخليكو ليا ونتجمع في الدنيا كتير وعند النبي عليه الصلاة والسلام وفي الاخرة اللهم آمين

كمان عايزة أشكر سلمى صلاح اللي قابلتها بالصدفة هناك وبجد فرحت لما شوفتها على حين غره

حلوة على حين غره دي ( وش بيغمز ) وأحب أهدى الغنوة الجاية لماما وبابا وعمو وطنط وكل اصحابي