أول ما طلع شريط تامر حسني " حب " كنت باسمعه قبل ما اروح الكلية على طول و أنا بالف الإيشارب .. و بالذات غنوة " لما بتكون بعيد " .. و بعد شريط كاظم الساهر " هل عندك شك " فضلت مدمنة سماعه كله إلا غنوة واحدة لفترة طويلة جدا جدا جدا بعد ما نزل .. حتى بعدما نزل الألبوم اللي بعده .. فضلت برضه اسمع ألبوم " هل عندك شك " و اتنقل بين حالاته كأني باتنقل بين بساتين من الزهور و انا باشرب القهوة الصبح برضه قبل ما اروح الكلية .. أما ساقية الصاوي فكنت باسمع قبل ما اروحها نجوم إف إم و كان دايما فيها برنامج عن التوظيف و برنامج عن الأطفال لدكتور محمد رفعت .. مكنتش باسمع أوي برنامج التوظيف ده .. بس كنت باحب اسمع برنامج الأطفال و بالذات أسلوب دكتور محمد رفعت الجميل ..و هكذا عادات كتير .. ارتبطت بالمذاكرة و بالصحاب و بفترات الحياة كلها فأصبح أجمل شئ إني اقرا رواية أجنبيه أو أحل تمارين انجليزي قرب الفجر مع البرنامج الموسيقي .. يا سلام .. مع إنه ممكن ده يكون أمتع - مثلا - الضهر و انا باسمع فيروز بس انا مجربتوش .. فالمثل المتخلف اللي تعرفه أحسن م اللي متعرفوش معشش جوه العقل الباطن و بخاصة مع الارتباطات الشرطية للأشياء يعني مثلا غنوة " باغير عليك " بتاعة هدى عمار .. سمعتها لما رجعت من الامتحان زمان و كنت حالة كويس فبقيت كل ما اسمعها افتكر إحساسي وقتها و هكذا .. أصبح الواحد أوقات بيعمل الشئ للرابط الشرطي مع إنه مش مستمتع بيه بجد .. لكن لو حطينا ف بالنا إنه ممكن يكون فيه حاجة مجربنهاش لسه أو حتى منعرفهاش ممكن تمتعنا أو تفيدنا أكتر .. أو نكون فيها أشطر أو نلاقي فيها أنفسنا أحسن .. حتى الحاجات اللي مخطرتش على بالنا قبل كده - بس طبعا في حدود الحلال - يمكن نلاقي فيها حاجة جديدة و جميلة و نستمتع باكتشاف قدراتنا اللامحدودة زي ما بيقولوا بتوع التنمية البشرية.. و نستمتع زي استمتاع الأم و هي بتشوف لابنها أول ضحكة و أو كلمة ماما و أول صرخة .. يمكن نلاقي راحة ف ده أوحتى نتعرف عليه
واللي يعيش ياما يشوف و اللي يمشي يشوف أكتر :)
جه ف بالي سؤال ملوش علاقة بالموضوع .. تفتكر ممكن تطفي التليفزيون قبل انتهاء الشوط التاني من ماتش مهم .. في الدقيقة 87 مثلا .. و تستنى لما تسمع النتيجة من حد تاني ؟؟
البوست خلص .. سلام
4 comments:
الحيـاة (أوقات) أخنـق من ده كللللله برضو يا إيمـان !!
إحساسـك بالأشياء هو مايمنحها جمالاً مـا!
.
.
وإنتي إحساسك حلو، لإنك إنسانة حلوة، ومش برج القوس
هههه
تحياااااتي
أشكرك يا إبراهيم و سلام مربع لمواليد برج القوس :)
اكتر حاجة بتعجبني فيك ايمي انك عندك قدرة غير متناهيه على التجدد و ده في راي صحي جدا
جميل ان يكون عندنا ذكريات حلوة و الاجمل ان يكون عندنا قدرة على الاستمتاع بحياة حلوة نعيشها الاول فتبقى ذكريات جديدة مستقبلا
يارب ايامك كلها تبقى حلوة
اما عن سؤالك التاني اه ... ممكن جدا ليه لأ ، انا عن نفسي بحب اطفي التلفزيون قبل ما المسلسل اللي بحبه جدا و بتابعه طول الحلقات بحرص قبل نهاية اخر حلقه بمفيش ... او يمكن حتى متفرجش عليها
الاهم باه ليه ؟
مش عارفه يمكن بحس بنوع من الاكتفاء و يمكن بكون خلاص و صلت لدرجة معينة من الاحساس بتكون كافيه جدا جدا ليه
شكلي كده رغيت كتير صح ؟ نهـــــــــــــــــــارك أبيض
أيوتة
انبسطت قوي لما لقيت اسمك
أتمنى أكون كده بجد
نهارك فل
بس غريبة بجد مبيحرككيش فضول أو رغة ف معرفة ما لو كانت فيه مفجأة ف النهاية عكس المتوقع
بس عموما الجميل بجد إنك تكون عندك القدرة على ده و تبقي أقوى منه
إبقي زوريني يا بنوتة :)
إنتي و بنوتتك :)
Post a Comment