من ستر مؤمنا في الدنيا ستره الله يوم القيامة

من ستر مؤمنا في الدنيا ستره الله يوم القيامة

أنا باحب جدا موقع

youtupe

لأنه فيه بجد حاجات كتير حلوة سواءا برامج أو أجزاء من أعمال فنية ... إلخ

و طبعا بما إننا ع النت في عالم مفتوح و اللي عاوز ينشر حاجة بضغطة زرار بينشرها

فالرادع الوحيد لأي شخص هو ضميره المتصل بالحق سبحانه و تعالى

إحدى صديقاتي العزيزات حذرتني من فترة صغيرة إني أكون في تجمع بنات أو حنة أو ما شابه و أخلع الحجاب أو أضحك براحتي مع صحباتي أو كده .. ليه .؟

لأنه فيه ناس بتصور ده و تحطه على يوتيوب و كل مرتادي النت يتفرجوا على بنت بزي غير شرعي لمجرد انها ائتمنت الناس على نفسها و دينيا مفروض البنت متلبسشي زي غير شرعي إلا في بيت مؤتمن

اللي عاوزة أقوله للي ميعرفش تجمعات البنات انها بتبقى لطيفة جدا لأن البنت المقيدة طول الوقت برا البيت بتاخد راحتها فبتضحك مع صحباتها و ممكن يخلعوا الإيشاربات أو يلبسوا لبس مختلف عن اللي بيخرجوا بيه و هما متطمنين أنهم مبيعملوش حاجة حرام أو مفيش حد بيبص لهم نظرة محرمة و بيكون الدار أمان زي ما بيقولوا

يكون الجزاء أيه ؟؟

انها تتفضح ع النت عشان بنت معندهاش ضمير صورتها

و ناهيك بقى عن التصوير اللي ف الشارع

مثلا فيه حد برضه على يوتيوب مصور بنت وولد في كافتيريا بس بشكل مش مظبوط و نازل عليهم تريقة

يا جماعة ربنا أمرنا بالستر

ع الأقل لو مقدرتش تمنع حاجة متنشرهاش

هنستفيد أيه من فضايح الناس ؟؟!؟

هنضحك ؟؟ يالها من استفادة عظيمة

يا جماعة ديننا حذرنا من تتبع عورات الناس و قالنا انه جزاء ستر المؤمن للمؤمن ستر الله له يوم القيامة

حتى أفظع الكبائر و هي كبيرة الزنا اشترط لإقامة حد الله فيها أربعة من الشهود

يعني واحد والعياذ بالله هيرتكب الكبيرة دي أكيد حياخد احتياطه ع الاخر تخيلوا بقى لو تمكن من مشاهدته أربع شهود

لدرجة أنه لم يكتشف سوى مرتين تقريبا في عهد الرسول عليه الصلاة و السلام

ما بالكم دلوقتي بس فضايح النجوم تملا كتب

مرة عمر بن الخطاب شاف واحد بيسرق فمسكه فالسارق قاله دي أول مرة قاله عمر فيما معناه لايمكن تكون أول مرة لأنه ربنا بيستر العبد مرات و مرات ثم يفضح

حتى لو حد عمل ذنب و محدش شافه لا يجاهر به فيكشف ستر الله عليه

مستشعرين عظمة كلمة : ستر الله

ربنا بيسترنا ليه نفضح الناس !!

دي مصيبة كبيرة والله

ربنا منع عن قوم سيدنا موسى المطر فدعاه سيدنا موسى عليه السلام فقال له الله عز و جل أنه منع عنهم المطر بسبب رجل مذنب يعصى الله أربعين عاما .. فأمر سيدنا موسى عليه السلام بأن يخرج هذا الرجل من بينهم - وهو لا يعرفه - فتاب الرجل إلى الله قائلا إن سترتني اليوم فلن أرجع لما كنت عليه فنزل المطر فقال سيدنا موسى لله : لم يخرج أحد من بيننا فقال الله له أن هذا العبد قد تاب فقال سيدنا موسى لله أرني هذا الرجل لأفرح بتوبته فقال الحق عز و جل لسيدنا موسى أيعصاني أربعون عاما فأستره و يوم يتوب أفضحه !

و غيرها من القصص .. الستر .. عدم التجسس و عدم السعي بين الناس بالنميمة و عدم الغيبة و عدم تتبع عورات الناس بالسمع أو النظر أو الكلام أو ما سواهم

دع الملك للمالك .. و لو بجد عاوز تكون إيجابي امنع الشخص أو انصحه باللتي هي أحسن أو سيب المكان لو فيه حاجة مش كويسة و انت مش مجبر تقعد فيه

كنت أتمنى أن تكون بين يدى المصادر ليكون كلامي أكثر ثقة و لكن لا بأس أنا باحكي معاكم بما معناه باللي قريته و سمعته

حتى الجلوس في الطرقات غير مستحب و له آداب منها غض البصر

حسيتوا قد أيه مصيبة أنه حد يصور حد لأ و مش بس كده ده بيفضحه كمان

و الموضوع وصل للاستهزاء بمشاعر الناس و بالدين و كل ده بيستغل ضد الإسلام

فإذن أن تكون مسلم = أن تكون قدوة و يمكن عن طريقك يدخل آخرون للإسلام

فما بالك إن كنت نجم تحت الأضواء أو واحد محبوب من الناس بتكون وقتها قدوة و عليك العين فخد بالك أوي من تصرفاتك و استغل ده عشان تنشر خلق قويم بين الناس

"إن الذين يحبون أن تشيع الفاحشة في الذين آمنوا لهم عذاب أليم في الدنيا والآخرة والله يعلم وأنتم لا تعلمون"

و أيضا هناك حديث للرسول عليه الصلاة و السلام بيقول فيما معناه أنه كلما أعلن عن الفواحش بغير خجل كلما ظهرت أمراض و مصائب لم يكن لها وجود من قبل ،، فالفواحش و الرزائل موجودة منذ الأزل و لكن وقتها ما كانت هناك أمراض مثل الآن

اتقوا الله

و الحقيقة أنا ولا مفتية ولا عالمة دين أنا مجرد مسلمة عادية بارتكب أخطاء و معاصي زي كل البشر مش باوعظ حد بس باحاول باللي ف إيدي أقول حاجة .. يمكن تنفع حد

و جزاكم الله خيرا