إنسانيات

إنسانيات

....

لـ حـ ظـ ـا ت حـ ـرجـ ـة

على الهامش/ كنت أتمنى زمااان أن أكون جراحة لسبب واحد أن أنقذ حياة إنسان ثم علمت فيما بعد أن الكيميا ستلازمني إن سرت في هذا الطريق و أنني ربما لا أتحمل

و لمن لم يشاهد هذا المسلسل فهو تدور أغلب أحداثه في مستشفى بين حالات مختلفة من الحوادث و العمليات و الجرائم أحيانا .. يتعرض لحياة الجراحين العملية بشكل خاص بدون أن يغفل كل البشر هنالك من مرضى و أهلهم و أطباء و ممرضين و عاملين في حيواتهم الخاصة ...... إلخ و به كم كبير جدا من الممثلين و ضيوف الشرف

دائما ما أتألم و أشمئز من منظر الجروح لكنني أتحامل على نفسي و أنا أشاهده .. قلبي جمد شوية .. كل ما قلبك بيجمد تجاه الحاجات دي بتزداد إنسانية على إنسانية .. فيه حاجات كتيرة أهم و أخطر من مشاكلنا الصغيرة نسبيا .. لما تشوف مريض بيموت قدامك و مش واحد كتير يوميا قلبك بيكبر .. و الدنيا كلها بتهون .. ليا قريب دكتور بعدما بدأ يمارس المهنة نوعا في سنة الامتياز اتغيرت شخصيته كتير .. الموت بيولد حياة

..............

تعرف تتونس بنفسك ؟؟

فيه حكمة لأفلاطون تقريبا بتقول أنه أصعب صداقة هي صداقة الإنسان لنفسه .. حقيقي .. إزاي تكون صديق لنفسك .. لازم أولا تحبها و تستوعبها و تتقبلها و تحاول توجهها .. لازم متزعلشي منها و تتصالح معاها

مهم كمان إنك تمتلك حد أدنى من القوة و الثقة و الحب بينك و بين نفسك .. قدر يخليك متزهقش و تستمتع و انت قاعد لوحدك .. قدر تواجه بيه الناس و تتعامل بيه مع البشر بمساحة من الأمان و كأن لك ضهر .. واللي له ضهر زي مانتوا عارفين ممكن يضرب على بطنه لو فيه واحد عنده ضهر أكبر

..............

حكمة القلب

دي حاجة إنسانية كده بتخليك زي الدكاترة النفسيين اللي بيحبوا مهنتهم تسامح كل الناس عشان إنت عارف دوافعهم زي ما قال أحد الأطباء.. تشفق ع اللي محتاج شفقة و اللي فاكر إنه مش محتاج .. تترفع عن الأخطاء و الصغائر و متشلشي ف نفسك .. تستوعب كل الناس .. يتسع حضنك لكل ما هو إنساني .. متنتظرش مقابل لعمل الخير ... وقتها هترتاح و حتى لو الدنيا اتهدت إنت ف أمان مادمت مع الله و لله بالله

............

الهليكوبتر فووووووووو

حاول تبص ع الدنيا من فووووووق .. بص ع الناس و نفسك و الحياة و البيوت و العالم و خد صاروخ و بص ع الكون من بره .. جرب حتلاقي مفاهيمك اتغيرت

............

التعرف على الإرادة

فيه وقت ممكن أضطر لعمل حاجة بمعنى اضطر مفيش حد غيري و الدنيا هتبوظ لو معملتش .. الحاجة دي ممكن اكون عمري ما عملتها و أقوى مني و عاوزة قلب جامد و تفكير سريع و حركة سريعة و أنا مش كده بس بجد لو اضطريت حبدأ أتعرف على حروف الإرادة جوايا و اقرا عمليا كلمة هقدر

متقلقش .. قدها و قدود

.............

بعض من الخيار مفيد أحيانا

زي ما باحب جدا أسمع شدو أنغام في أطيب قلب أو أصالة في لو تعرفوا أو حتى كاظم في أشكيك لمين .. باحب أحيانا أسمع يا بنت السلطان و الخيار الخيار و عايزاني أخس أخس .. النفس متنوعة و التنوع صحي و جميل .. عجبتني نهى محمود اللي كاتبة ف البروفايل بتاعها ع الفيس بوك باحب أسمع عمر خيرت و بعرور

..........

يجعل فرحتك نور ف عنيا

عملت لماما انهرده حاجة كان نفسها أعملها من زمان رغم إني مكنتش حباها قوي .. فرحت قوي و جت باستني و حضنتني حسيت وقتها بالجملة اللي بتقول : يجعل فرحتك نور ف عنيا و حسيت قد أيه أنا باحب ماما

............

و العمر فيه كام قد أيه

قد أيه جميل إنك تتطوع في أي حاجة .. قد أيه جميل إنك تساعد الناس و تقدم خدماتك .. وتلاقي ناس كتير معاك متعرفهومش بس معاك في عمل خير .. إحساس حلو قوي لما تلاقي حيوان مثلا بيقولك بعنيه شكرا أنا باحبك .. أنا مجربتش بس أعتقد ده

..........

البوست ده كان مفروض يطلع أجمل من كده و أبلغ بكتيييييييير بس معرفش إيه حصل لما جيت أكتبه و مش عارفة يمكن أظبطه بعدين بس مش صابرة عليه

على الهامش / 30 يناير عيد ميلادي ( لا داعي للتصفيق :) بجد ادعولي يتحقق لي ولو جزء من أحلامي إلى أن يأتي هذا اليوم و أنا متفائلة خير إن شاء الله