بحبك .. وحشتيني

بحبِك .. وحشتيني

بحبِك .. وحشتيني .. أنا آسف على التأخير .. مليش بعدِك يا نور عيني

حاجات لازم تقولها كتير .. عشان قلبي عليك يرضى .. و متخليش هواك يهدى .. ده من غيره الحياة بارده .. و بيه يبقى قليلها كتير .. حاجات ممكن تغيب عنك بسيطة و سهل معناها لكن بازعل قوي منك و انا شيفاك بتنساها .. متنساش الكلام أرجوك عشان كل اللي بيحبوك .. عنيا و قلبي و سنيني .. بيستنوا و يترجوك .. ساعدني و قولها لو تسمح عشان لما ف يوم تجرح ألاقي لك حاجات عندي أقولها لقلبي لو يسمح

.....................

تعلّم أن تخبرهم بما في نفسك .. فتقول لصديقك " لو كان من نفس الجنس " / والدك / والدتك / أخوك/ أختك/ معلمك بغير مناسبة

بحبك / أنا مبسوط قوي إننا خرجنا سوا النهرده / أنا مبسوط قوي بوجودك في حياتي / الحمدلله أن ربنا عوضني خير بصاحب زيك / بجد وقوفك جنبي دعمني كتير / ربنا يخليك ليا / يا رب ميحرمنيش منك / أنا آسف عشان ظروفي منعتني أكون معاك / عشان كنت عصبي شوية

تعلم أن
/ تربت على كتف صديقك / تحضنه حينما يحتاج لذلك أو دون أن يحتاج / تقبل جبينه / تبتسم له و تغمره بنظرة حنان / تطبطب عليه

وتعلم أن تقولها بغير كلمات

تشتري له باقة زهور تنتقيها من قلبك لتقول كل زهرة فيها رسالة / تشتري له هدية نفسه فيها حتى لو كانت قرطاس لب / تشتري له هدية شخصية مثل زجاجة عطر أو خاتم هدية لا يحضرها إلا المقربون / شيكولاته

و تعلم أن تطلبها

أنا محتاجك تسمعني / محتاج تكون جنبي ف الموقف ده / حكون مبسوط لو كنا سوا ف المشوار ده / لما أكون باعيط طبطب عليا ده حيهديني جدا / كلمني عن مكانتي عندك و شعورك ناحيتي أنا عارف بس أحب اسمعه / أنا محتاج أفضفض من غير ما اسمع نصايح أو حلول / خلي إيدك ف إيدي قبل الحفلة كده أنا حتطمن أكتر / أنا حسيت بالوحدة لما مسألتش عليا

مش لازم أكون باعمل عملية خطيرة عشان أحس بحب و اهتمام اللي حواليا

ولا لازم اكون في موقف صعب أو مشكلة كبيرة عشان أحس بوجودهم جنبي

و مش لازم يكون عيد ميلادي عشان يجيبولي هدية

و مش لازم أكون زعلان عشان يقبلوا جبيني

أحيانا نعتمد على إنه الطرف التاني عارف إني باحبه زي الزوج اللي بيقول لزوجته لو مكنتش بحبك مكنتش اتجوزتك أو إنتي جاية بعد كل ده بتسأليني أو حتى على مستوى الصحاب بعد كل العشرة دي مش عارف مكانتك عندي

و يا سلام بقى لو قلبت هزار و سخرية و جرحت مشاعر الطرف التاني اللي انت بالفعل بتحبه زي إنت شكلك رايق و فايق أو لا انت مبقتش غالي عندي

أو حتى إنكار و اتهام و أحيانا إهانة إنتي لو مش حاسة إني بحبك تبقى مبتحسيش أو لو مش شايف ده بعنيك يبقى قلتهم أحسن أو الكلام ده لما تخلص كل مشاكلنا نفضى عشان نغازل بعض

معنى إني أطلب الاهتمام و الحب إني فعلا محتاج لهم و من الشخص ده تحديدا و طالما العلاقة متبادلة و الطرف التاني ارتضى ده يبقى لازم ندعمها و نرويها .. ليه لما بتستقر علاقاتنا بالناس بنقتل روح العلاقة و توهجها و تجددها اعتمادا على إنه علاقتنا بالفعل موجوده و قوية .. التعبير عن مشاعرنا بالذات للناس اللي بنحبهم مهمة جدا و بطرق مختلفة و من غير مناسبة .. و لو رجعنا لديننا الجميل حنلاقي إنه التصافح بيسقط الذنوب و إنه اللي بيبدأ بياخد حسنات أكتر كتير و تبسمك في وجه أخيك صدقة و أن تلقاه بوجه طلق و ترحابك بضيفك و مراعاتك لجارك و تقبيلك أولادك و رفقك بزوجتك / زوجك / أباك / أمك / أختك / أختك / أقاربك / حتى أي بشر حتى لو من ملة تانية / حتى الحيوان و النبات

رحمة

اللي بيحصل إنه أغلب الناس بتعمل ده مع الحبيب / الحبيبة فقط مع إنه مش عيب لما ده نعمله مع كل الناس حياتنا حتفرق كتير و الحب حيملى قلوبنا بالرحمة و التراحم .. قدر الإمكان و نقدر برضه إنه يصعب على البعض ذلك لأنهم متعودوش عليه أو ظروفهم لفترة مش سامحة

محتاجين نتملي دفا و نملى اللي حوالينا بالدفا و بالذات في ظروفنا الصعبة دي محتاجين دعم معنوي عالي جدا أكتر من زمان وقت الروقان و الهدوء

و أنقل لكم مما قرأت في هذا الموضوع>>>م <<<

لا تبخل بـ " أحبك "
عندما كنا نحتفل بمرور خمسين عاماً على زواج أمي وأبي سمعتهما يتحدثان دون أن يشعرا بوجودي ، لقد كان أبي من ذلك النوع الصارم الكاتم لمشاعره فليس يبديها لأحد ، وكان يحبني كثيراً لكنه ما قال لي ذلك قط
سمعت أمي تسأله فجأة : أتحبني؟؟

ولمحت تعابير الصدمة على وجهه لكنه تمالك نفسه قبل أن يقول:

لقد قلت لك بأني أحبك في الليلة التي طلبت فيها يدك، ولو غيرت رأيي فسوف أخبرك
وابتسمت وأنا أقول في نفسي:
"هذا رائع يا أبي لكن ذلك كان منذ خمسين عاماً"
إن لكلمتي "أنا أحبك" تأثيراً عميقاً في تجاويف الفؤاد، وأعماق النفس، ومع ذلك فإننا نتردد أحياناً في الإفصاح عنها.
قال رسول الله صلى الله عليه وسلم: "إذا أحب أحدكم أخاه فليعلمه أنه يحبه".1

:)

إتعلم إزاي تقول اللي جواك حتلاقي ألوان دنيتك اختلفت - بس اتدرب عليها كتير- صدقني و جرّب