.jpg)
مجرد أمنيات
اتفقنا كل يوم سبت أسرتنا و باقي العيلة على التجمع فـ البيت الكبير .. و الحقيقة هو مش كبير ولا حاجة بس بيساعنا كلنا .. أنا و زوجي و أولادي و أختي و زوجها و أولادها و ولاد خالتي و ولاد خالي و أزواجهم و أولادهم .. اليوم ده بيكون دايما الاختلاف على مين هيقف فـ المطبخ .. اتفقنا على حل وسط .. نعمل قرعة .. و من حسن حظي و سوء حظهم إنها بترسى عليا كل مرة :) .. الحكاية دي تعبت معدتهم فقررنا حل تاني .. كل واحد يجيب من بيته الصواني و الحلل ناقصة ع السوا عشان نستغل الوقت و نقعد مع بعض أطول فترة ممكنة .. بعد كده بنروح كلنا بالتلات عربيات اللي حيلتنا الـ 128 النادي .. أينعم بنقعد فوق بعض فيهم بس مش مهم المهم نقعد .. العيال بيصعبوا عليا أوي بيتفعصوا وسطينا .. و ف النادي بتكون قاعدة لطيفة و الولاد بينبسطوا جدا .. و ناكل ايس كريم .. و نحبس بالقهوة .. مش بناكل كتير اليوم ده بيكون المهم بند النكت اللي بيحضره علي جوز بنت خالتي من قبلها بيوم .. و فرحة بنتي بتقوم بالاستعراضات اليوم ده .. البت دي اخرها الفوازير .. أما الواد يوسف ابن أختي تخصص نحت .. الحكاية دي وراثة أصلها .. بيجيب لنا كل مرة شكل مختلف و ياخد عليه الآراء.. و عملنا تقليد ظريف كده شفناه ف فيلم أجنبي .. بنستعرض إنجازات العيلة ابتداءا بشهادات كي جي وان لحد الترقيات و خلافه .. و بعدين نروح كلنا بربطة المعلم السينما .. البنت بتاعة شباك التذاكر بتتسرع لما تشوفنا .. بشرط يكون الفيلم كوميدي .. أينعم الواد وليد ابن ابن خالتي و البت لجين بنت ابن خالتي التاني بيتحايلوا علينا عشان نروح فيلم رومانسي .. بس أبدا .. شكل العيال دول بيحبوا بعض و الكبار واخدين بالهم بس مطنشين بمزاجهم يعني .. و بعدما بنستهلك كميات مهولة من الفشار كل واحد زي الشاطر بيرجع على بيته عشان يلحق يتدلق ع السرير لتاني يوم الصبح .. الحقيقة أكون كذابة لو قلت بنوصل بعض .. إحنا بس بنتطمن على بعض بالرنات أول ما نوصل .. حد يقوللي أومال فين كبار العيلة .. دول سيادتك ليهم ترتيبات مع بعضهم كده يوم الجمعة أصل ده كان الأجازة الرسمية ف مصر زمان
........................................
يوم الخميس بقى بيبقى يوم جميل .. بنتفق أنا و جوزي و أصحابنا على عزومة كل مرة ف بيت حد كإفطار جماعي لأننا بنكون صايمين اليوم ده .. إحنا لينا أصحاب اسبيشيال كده مش هقولكوا عليهم هما عندنا و احنا عندهم على طول .. دول بجد زي الأهل .. بنقضي عندهم يوم كامل و بيقضوا عندنا يوم كامل .. و أولادنا كمان صحاب .. دول كمان بيكونوا موجودين يوم الخميس في اللمة .. الشرط اليوم ده كلنا نجيب لبعض هدايا من محلات بتاعة كل حاجة بـ 2.50 دي .. دي ف مصر بقالها حوالي 15 سنة كده .. الهدايا دي بيبقى لها فرحة مختلفة .. طبعا إحنا السيدات الكرام بنتعصر في المطبخ و بتكون قعدتنا سوا هناك و الرجال الأفاضل ف الصالون يتناقشون في شئون العالم.. بس أيه مبنرحمهمش كل شوية واحد ينزل يجيب حاجة .. حد يقطع السلطة .. و واحد يقطع البطاطس .. بيعملوا الحاجات البسيطة دي عشان بس يبقى اسمهم عملوا حاجة .. طبعا مش بنكون عند بعض من الصبح بس وقت المغرب كده نكون كلنا رجعنا من شغلنا .. و بيكون برضه اليوم ده أكلات ناشفة و بسيطة عشان طبعا الوقت مش بيكفي حوالي ست ساعات بس
.........................................................
أما بقى الجيران دول حكايتهم حكاية .. كل شهر بيكون الاجتماع عند حد .. غالبا بنتفرج ع المسرحية .. العلاقات وطيدة إلى حد ما بس بنكون جنب بعض جدا في أي وقت .. مش لازم وقت زنقة يعني .. بس أجمل حاجة لما واحدة فينا بتكون عاملة صنف جديد بتوزع علينا كلنا كميات بسيطة بس بيبقى جميل .. و ساعة ما بينجح حد م الأولاد بيتعمل له حفلة مش صغيرة في نادي صغير جنب البيت أو في شقة حد م الجيران حسب الظروف وقتها .. و الجميل إننا كل يوم جمعة بنروح كلنا حتى الأطفال نصلي الجمعة في المسجد اللي جنب البيت .. ده طبعا بينطبق ع الناس اللي مش بتتشغل يوميها .. الحقيقة دي بتكون لفتات جميلة عشان نطبق توصية الرسول عليه الصلاة و السلام بالجار
.......................................
أما في شغلي العلاقات لطيفة نوعا ما .. رغم إنه فيه مقالب و قيل و قال بس فيه حاجات حلوة برضه .. كل يوم اتنين بنكون كلنا صايمين و نفطر سوا في المكتب فطار أورديحي كده بس أجمل فطار بجد
و بنلم اللي فيه النصيب عشان الصدقة .. و أحيانا بنروح أماكن خيرية عشان ربنا يرضى عننا و يغفر لنا و نساعد المحتاجين دول اللي ملهمشي حد
......................................
قررت أنا و أسرتي الصغيرة عمل نص ساعة يوميا فيها كذا حاجة
التسامح: كلنا بنسامح بعض من غير ما نسرد مين غلط ف حق مين بإيه تجنبا لكشف ستر الله
التشجيع : كلنا بنشجع بعض مفيش كبير و صغير عندنا .. التشجيع في أسرتنا حق لكل مواطن
النصيحة : كل واحد بيكتب ع الكمبيوتر نصيحة لكل فرد في الأسرة حتى الواد فارس الأوزعة ده بيكتب و بنحط كيس صغنون لكل واحد فينا نحط فيه النصايح تجنبا للإحراج ..و غالبا النص ساعة دي بتكون وقت العشا أو الفطار حسب شغل بباهم
و ف أوضة المعيشة اللي مش بيدخلها غيرنا أو الناس القريبين جدا من أصحابنا أو أهلنا فيه سبورة صغنونة كده عليها إنجازاتنا ملتحمة مع بعضها البعض و رسم و شخبطة و حاجات .. كل شهر بنتفق تتمسح السبورة و تتكتب من جديد عشان يفضل دايما عندنا أهداف ، و أكتر شهر بيكون فيه إنجازات بنعمل يوم الشيكولاته .. الحقيقة بباهم اللي بيدفع دم قلبه اليوم ده .. بس هو راضي و قابل هو حد كان قاله اتجوز !!:) بيشتري لنا كلنا شيكولاته كبيرة و بنروح كافتيريا فخمة جدا مش هقولكوا على اسمها نشرب هوت تشيكولات سوا .. الظاهر كده الحكاية دي هتبقى على مدى أبعد شوية عشان البت فرحة جت لها حساسية من الشيكولاته .. أنا بحب أفراد أسرتي جدا ربنا يديم علينا السعادة
...................................
ملحوظة صغيورة جدا
........................................
أنا مش متجوزة ولا ولاد خالتي ولا ولاد خالي ولا أغلب أصحابي متجوزين ولا باشتغل و بالتالي مفيش أسر ولا أولاد ولا نادي ولا بتاع و بالتالي كل اللي فات ده كانت أحلام أتمنى إنها تتحقق أو تتحقق أجمل منها و مين عارف ؟؟
5 comments:
يااااااااه تعرفى انى سرحت فى البوست ده جامد حسيت بكل كلمة فيه بجد تعرفى حسستينى ان النسني جريت وكل واحد بقى ليه بيت واسره بس برضو مع بعض انا ساعات بتخيل واقول امتى بقى نبقى انا واصحابى اللى هما اخواتى كل واحدة اتجوزت اللى كانت تتمناه او شوية منه حتى ونبقى مع بعض برضو مفيش حاجة تفرقنا وعيالنا بقى مفيش كلمة طنط دية خالص يا يقول ليا خالتو ياما فلا مش امه تبقى اختى اصل الاخوة مش بالاب والام وبس لألألألأ ياااااهب حلم باليوم ده اوى ونفسى بجد اشوفه هبقى مبسوطة اووووووووى وخصوصا لما يبقوا اجوازنا ان شاء الله برضو يبقوا اصحاب ونبقى كلنا كدة اصحاب فى بعض مش عيلتنا وبس لأ واصحابنا برضو بتوع زمان ويا سلام بقى لو عيالنا حبو بعض البنت والواد بجد هتبقى حاجة تحووووووووووووووفة
ربنا يا رب بحق هذا الآذان اللى كان من شوية وبحق صيامى يا رب يحقق ليكى كل اللى تتمنيه انتى واحنا وكل الناس يا رب باذن الله
بجد بجد بحبك اووووووووووووووووى
بجد حلو موووووووووووووووت
عشت مع كل كلمه فيه
وتخيلتنا انا وانتى كده وأصحابنا المقربين وأقاربنا واحنا بنطبق علينا النظام الحلو ده
طريقه سردك حلوة اوووى حسستنى ان فعلا فيه واحده متجوزة وعايشه القصه دى وعماله تحكى
ان شاء الله نسمع الحكواى دى منك انتى قريب بإذن الله
تسلميلى يا عمرى
نسيت أقول حاجة ان ان شاء الله الامنيات دى كلها هتحقق طول ما فى قلوب بيضا بتعيش على محبة الناس وعلى الود والتراحم
مجرد أمنيات
امبارح كانت امنيتى الوحيدة ان المدونة تقبل منى الكومينت لأنى بعته اكتر من 7 مرات
المهم بما انى اول مرة اعلق فى المدونة هنا فكنت عاوز اقول كام حاجة كده قبل ما اعلق على البوست نفسسه
أولا عاوز احييكى على اختيارك بعناية لكل الصور اللى موجودة فى المدونة بتاعتك
بصراحة يعنى بسم الله ما شاء الله واضح انك ذواقة جدا فى اختيار الصور المناسبة وتناسق ألوانها مع ألوان الخلفيات الموجودة بالمدونة
ثانيا واضح ان عندك موهبة جميلة جدا فى الكتابة وخيالك واسع الأفق ليه ما تستغليش الموهبة دى فى التأليف مثلا؟؟ او كتابة قصص قصيرة ؟؟ أو حتى مقالات وتحاولى تنشريها فى مجلة او جرنال يكون لسه بيبدأ علشان ميبقاش فى تعقيدات قدامك .
ثالثا بقى بالنسبة للبوست نفسه
فكرتك جميلة جدا وبسيطة خالص عن تكوين الأسرة والحياة الزوجية والعيشة الهادئة التى لا تشوبها المشكلات , واضح كمان ان عندك كم رهيب من مشاعر الأمومة والرومانسية اللى منتظره فارس أحلامك علشان تغديقى عليه بيها وتصبيها صبا على قلبه كى يذوب بهواكى ومشاعرك الرقيقة , ايضا سيكون لكى ابناء محظوظين فلهم ام تجمع مشاعر امومة تكفى لأطفال العالم كله
بجد ربنا يكرمك ان شاء الله ويوفقك للشخص اللى يسعدك ويحققلك اللى بتتمنيه
وان شاء الله هتلاقينى هنا كتير لحد ما تزهقى منى
vip_msb (فتى الكهف)
انا عشت مع كل لحظه فى كلامك
لمست الاحساس الجميل ده
ان شاء الله احلامك كلها تتحقق يا ايمى
Post a Comment