" كان ماشي فـ أمان الله .. هوب .. خبط ف حاجة .. الحمد لله محصلش حاجة .. شوية ..الله .. دي حيطة .. يوه .. طب ناوي على ايه يا كابتن !؟ .. عاش مع نفسه .. " هي دي حيطة .. مممممم .. طيب ايه جابها هنا .. و اشمعنى انا يعني اللي اتخبط فيها .. طيب ليه مخدتش بالي .. أما انا غبي بصحيح " و بدأ يتحسسها .. " اه والله دي حيطة .. ممم.. مش متهيألي يعني " و قعد بقى مع تاريخ الحيطة و هويتها ................
ده فيما معنى كلام لدكتور شريف عرفه على موقع بص و طل
................
باسأل نفسي حاليا السؤال اللي استهلكه الفلاسفة - بما إني فيلسوفة زماني .. إحم - هو الإنسان مسير ولا مخير ؟
بس باسأله بقى بشكل مختلف - لازم يكون للواحد بصمته برضه - هو فيه بشر كئيبين بطبيعتهم يعني المتعوس متعوس و لو حطوا على راسه فانوس ولا ممكن الواحد يتغير ؟
علماء النفس و التنمية البشرية بيأكدوا إنه الواحد حقيقي بيتغير مجرد ما أفكاره تتغير
الفطرة اللي ربنا فطرنا عليها أكيد قمة ف الإيجابية .. طيب فيه كتير جدا سلبيين
هو بقى الواحد لما يحب يغير حاجة بقالها عشرين سنة مثلا ينفع ؟
و لما تكون الحاجة دي نظرته للدنيا ينفع ؟
" النايم في الميه " ممكن يصحى تاني ؟
النايم في الميه ده تعبير للأخ الفاضل / مصطفى الحسيني و يقصد بيه اللي مش دريان بالدنيا ولا سامع اللي حواليه و فاكر انه دي دنيته و كده
لقيت بشر نايمين ف الميه - بمزاجهم - و حاسين انه ده الطبيعي و مش عاوزين يصحوا
حتى ف الشعر و الأدب كتير بنلف حوالين المشكلة اللي ملناش يد فيها و نقعد نبكي جنبها و نتحسر ع الدنيا و العيشة و كده ..
هي الدنيا بتيجي لحد لحد عنده ؟ ولا احنا لازم نروح لها ؟
انا متهيألي الاتنين مع بعض
كنت قاعدة ف بيتنا بقى و منتظرة الوظيفة اللي تتلاءم مع مواهبي تيجي لي لحد باب اوضتي و تخبط فافكر افتح ولا لأ
أنا أستحق .. أيوة
لكن
لازم أعمل بنفسي لنفسي برضه .. زي واحد عايش ف بيته لوحده و كسلان تحت البطانية .. " اه .. انا مش هقوم إلا لما أشرب الكابوتشينو بتاعي .. بس يكون معمول بلبن مش ميه و ياريت لو السكر مش كتير .. و يكون ف مج مش كوباية .. و إلا بقى مش هشربه ولا هقوم .. بس .. هه .. خليني نايم "
:)
ماشي يا عم
خليك بقى نايم ليوم القيامة
لا .. لحد ما حد يتصل بيك .. و خليه ييجي بقى يعمل الكابوتشينو بس ربنا يخليك اعملي معاك
أصله مش هيتعمل ببصمة الصوت يعني و لا لوحده
ف الجنة إن شاء الله أيوة لكن احنا ف الدنيا
..............
عاوزين بقى مدير أعمال سوبر أوبشنز .. يعرف اللي احنا عاوزينه قبل ما نعوذ و يعمله قبل ما نفكر
.............
نرجع لمرجوعنا .. الإيجابيين ف الدنيا و الناجحين و كده .. دول اتغذوا بأغذية إيجابية مثلا ؟ فمش هيتغيروا
و السلبيين مفيش فايدة بقى لو قاموا لازم يقعوا فخليهم ع الأرض أحسن
و يبقوا زي الرواية الشهيرة للي مدخلش لاجنة ولا نار لأنه معملش لا حسنات ولا سيئات
...........
مش عارفة بقى والله .. بس انا نفسي أسمع آراء و كلام واقعي مش كلام جرايد
3 comments:
التمبليت بتاعك تحفة
ما شاء الله
كمان الموضع فكرته حلوة قوي
متوقعة ليكي الازدهار و التوفيق ان شاء الله
تعالي
مساء الورد يا إيمى
الكلام اللى فى البوست ده كلام مهم
وإن مكتوب بسرعه شويه
على اى حال الأزمة دى وبكل تفاءل عمرها ما هتتحل لأن من ساعة ما بدأت الدنيا
والناس فى منها اللى بيعافر ويخبط ويرزع عشان يعمل حاجه كويسه
ومنهم اللى ما بيتحركش أصلاً لحد ما يموت ومنهم اللى شوية كده وشويه كده .. وهكذا والأنواع كتير
وأعتقد ان اللى يهمك فى المقام الاول ( انتى فين من ده كله ) وانك تختارى ان كان هيكون لك تأثير فى كل شىء بيحصل حواليكى وكل الناس حواليكى ولا هتختارى العكس ولا هتفضلى تعافرى دايمًا ولا هتتقرى فى لحظة انك تكبرى دماغك وتنامى زيهم . ( طوبى لمن أصلح ما أفسد الناس )
وما تضايقيش نفسك على أى حال
أنا مبسوط بالبلوج بتاعك
طهقانة : أشكرك من كل قلبي .. و أتمنى تكرري الزيارة الحلوة دي
........
أخويا العزيز / مصطفى
مساء النور
منور البلوج بأولى تعليقاتك
أكيد مهم طبعا مش أنا اللي كاتباه :)
فيه ناس بتقدر تتعامل مع المود السئ أو الحالة النفسية الكئيبة اللي جايز تكون من غير سبب فميأثرش ده عليهم إلا بقدر ضئيل و ناس تانيين مبتقدرش و حياتهم كلها تتعطل
بس متهيألي الأساس لده كله إنه الواحد يحب نفسه بشكل مظبوط و يبقى له هدف ف الدنيا
متهيألي مهم جدا كمان الناس اللي بتحتك بيهم لأنهم طول الوقت إما رسائل سلبية أو إيجابية لعقلك الواعي و اللاواعي
الحياة كلها كفاح بجد
رأيك أثرى البوست يا ريت متبخلش ع البلوج بالزيارة و التعليق
.......
شكرا جزيلا
Post a Comment