هو العمر واحد بجد ؟؟؟

بيقولوا : من شاف بلاوي الناس هانت عليه بلوته

الناس بتتصبر كده .. يا ترى مينفعش نشقلب المثل :" من عاش فـ فرح الناس كأنه شاف فرحته " اقتراح يعني

احنا مؤمنين الحمد لله أنه ربنا سبحانه و تعالى : العادل و مؤمنين أنه لا تموت نفس حتى تستوفي رزقها و أجلها كما أخبرنا الرسول عليه الصلاة و السلام و إنه الواحد يحب لأخيه كما يحب لنفسه

لما بنكون فرحانين أو زعلانين بنحب الناس تتشارك معانا و غالبا بنتشارك مع الناس القريبين مننا

لو افترضنا مثلا إنه الحب الحقيقي بيقابل الواحد مرة فـ حياته ،، و الفرح الصادق مرات معدودة ،، و التميز مرات معدودة

جرب يدق قلبك مع كل دقات قلوب اللي حواليك .. جرب تبتسم عشان اللي جنبك فرحان .. حتعيش مليون حياة

أنا ضد إنكار الذات و شمعة تحترق من أجل الاخرين و كده

بالعكس الواحد ضروري يدلع نفسه و يديها حقها تالت و متلت

لكن بما إن الرزق متحدد و ربنا عادل و رحييييييم ليه نهري و ننكت ف نفسنا لو حد حصل له حاجة كويسة !!؟

لو مثلا حد عقيم ليه يحقد على كل حد عنده بيبي ؟؟

ده ممكن يعيش الفرح معاه و يلعب مع كل طفل اتحرم من أهله

سبحان الله مقسّم الأرزاق !! يمكن لو عندك اللي عنده كان يبقى نقمة عليك

أهم حاجة بس الواحد ميقصرش و ياخد بالأسباب و يسيبها على الله

حكمته سبحانه و تعالى فوق إدراكنا و رؤيته سابقة رؤآنا

جرّب توسّع قلبك و تحتوي ابتسامتك كل العيون حواليك

الحسد بياخد مننا و الحب بيدينا

و لو ربنا حرمنا من حاجة متع بيها غيرنا نتمتع بمتعته و مسيرنا ناخد رزقنا

ربنا يوسع أرزاقكم كلكم و يقدركم على الأخذ بالأسباب يا رب و أنا معكم

إيمان