يا اهل المغنى دماغنا وجعنا دقيقة سكوت لله
داحنا شبعنا كلام ماله معنى يا ليل و يا عين و يا آه
ــــــــــ
طلعت موضه غصون و بلابل شابط فيها حزين
شاكي و باكي و قال مش عارف يشكي و يبكي لمين
و اللي جابت له الداء و الكافيه ، طرشة ماهش سمعاه
يا اهل المغنى دماغنا وجعنا دقيقة سكوت لله
ــــــــــ
ردي عليه يا طيور بينادي ، و ارمي له الجناحين
و انت كمان يا وابور الوادي ، قل له رايح على فين
قل له إياك يرتاح يا بابوره ، و يريحنا معاه
ياهل المغنى دماغنا وجعنا دقيقة سكوت لله
ــــــــــ
كل جدع فرحان بشبابه يقول في عنيّه دموع
ياللي جلبتي شقاه و عذابه ، حلي لنا الموضوع
طالع نازل يلقى عوازل واقفة بتستناه
ياهل المغنى دماغنا وجعنا دقيقة سكوت لله
ــــــــــ
حافضين عشره اتناشر كلمه ، نقل من الجوزنال
شوق و حنين و أمل و أماني و صد و تيه و دلال
و اللي اتعاد ينزاد ياخوانا و ليل و نهار هواه
ياهل المغنى دماغنا وجعنا دقيقة سكوت لله
................
بيرم التونسي
3 comments:
برغم الهبل الموجود على الساحة دلوقتي بس بجد في ناس رائعين من وجهة نظري زي أنغام ، فضل شاكر ، أصالة ، كاظم الساهر وغيرهم يعني لسه ممكن نسمع غنا
أمل
ممكن طبعا نسمع غنا
لكن اللي يقعد أدام الدش نص ساعة يكره حياته
بقى كل واحد معاه فلوس و عايز يبقى نجم و كل واحدة شايفة نفسها يطلعوا يصدعونا بكلام تافه أو صور سفيهة
و أنا معاكي في كل اللي قولتيهم و أضيف لهم محمد منير
على فكرة يا أمل
انتي لك من اسمك نصيب:)
Post a Comment