جائزة فالانتينو القطة المغمضة

بطاقته الشخصية
الاسم / س. س.

النوع / شاب

السن / 28 عام

الحالة الاجتماعية / أعذب

س . س. شاب أعذب و هو ككل من فى عمره من الشباب يفكر فى حياة الزواج و الاستقرار بعد أن قضى حياته الماضية المراهقة والشباب( بالطول و العرض ) أى أنه كان (مقطّع السمكة و ذيلها ) كما يقولون و عرف بنات ( بعدد شعر رأسه). لكن س. س. حينما فكر فى الزواج قالت له أمه : هتتجوز مين من كل البنات اللى تعرفهم ؟
فأجابها بسرعة و بتلقائية : يا أمى أنا لا يمكن أتجوز بنت عرفتها قبل كده ؛ لأننى ممكن أشك فيها بعد الجواز مش يمكن تعرف حد تانى بعد الجواز زى ما عرفتنى و ليه وجع الدماغ ؟ لما باتجوز باختار أم لأولادى و زوجة أءتمنها على بيتى و اسمى عشان كده لازم تكون ( قطة مغمضة) ما تعرفش منظر الشارع .

فقالت أمه : طب ليه عرفت كل البنات دى طالما مش حتتجوز ولا واحدة منهم ؟

فأجاب : أدى الواحد( بيتسلّى) ولّا أقعد وسط أصحابى من غير ما يكون لىّ( مغامرات) يا أمى( أنا راجل) دورى لى

على عروسة من معارفك بس أهم حاجة سمعتها و عفتها و ما يكونشى سبق لها أيه تجارب عاطفية .

و فى مشهد آخر بين العروس القطة المغمضة التى اختارتها والدة العريس على ذوقها بحيث تتوفر فيها الشروط أعلاه و بين والدتها :

العروس ع. م .: يا أمى إزاى أثق بشخص زى ده ؟ الأم: يا بنتى واحد زى ده ( بينصلح حاله) بعد الجواز و المسئولية ع.م. : و ليه أوافق عليه أصلا ؟ الأم : لأنه راجل له تجارب فى الحياة و ده يخليكى تحترميه و تتطمنى معاه
ع.م: و أنا اللى حرمت نفسى من كل لذات الحياة فى انتظار زوج المستقبل اللى تتفتح عيوننا على الدنيامع بعض مليش أى اعتبار و كأنكم بتكافءوا ا الدون جوان فالانتينو ببنت زيي و تقولوا له "برافو عليك خذ جايزتك" ليه ما يتجوزش واحدة زيه؟ مش هو ده العدل
برضه

؟ ليه مش بيرضى لنفسه اللى بيرضاه لغيره ؟!

الأم : يا بنتى ده راجل(مافيش حاجة تعيبه) حتى و لو كان بيرجع للبيت بعد نص اليل و بيعرف ( نص بنات البلد) أمال انتى عايزة واحد بيستحى !

ع.م. : و ماله يا ماما اللى بيستحى لأنه إنسان محترم و فاضل هو الحياء بقى وصمة عار دلوقتى و هى الرجولة إن الراجل لازم يكون فالانتينو ؟؟

الأم : باقول لك إيه مش عايزة كتر كلام الحياء ده للبنات و بس و الراجل يعمل اللى يحلى له