نفسي تحبني وانا بحبك .. فيلمسني حبك مش بس اشوفه .. نفسي تحضنّي عنيك وهي بتلمع سحر .. وانت بتبص لي بنظرة بتاعتي أنا لوحدي .. منّك إنت لوحدك .. وتملّس بصوتك الخشن القوي ع الحروف .. فيبان أنعم وأرق بيانو في الدنيا .. تقوللي إني جميلة ورقيقة .. وعنيا حلوه .. وضحكتي محصلتش .. وتقوللي انك شايفني حلوة مهما كانت عيوبي أو أخطائي .. انك بتحبني عشان بس بتحبني .. عشان أنا أنا .. ومفيش أسباب .. ساعتها بصراحة كان نفسي اتشعبط في رقبتك زي الأفلام وتلف بيا .. وتحضني جامد .. وتملكني .. ويبقى حضنك ده دنيتي الكبيرة/الصغيرة .. ياخسارة .. ياريت كان مكتوب كتابنا .. بس ملحوقة .. ليك عندي حضن يا سيدي .. حضن متعبي شوق سنين .. وتعب بعاد .. واحتياج أمان ودفا .. حضن قوته الوحدة والبرد والخوف اللي كنت بحس بيهم من غير نور عنيك .. حضن كان خايف أوي إنك متاخدوش .. حضن دور عليك في كل خطوة ومكانش عارفك .. مش محتاجة اقولك اني بحبك من يوم ماروحي حست بفراغ على قدك .. وان قلبي شال اكتر من طاقته في هم الحب ده .. وتعب بجد من المقاومة ساعات والتجاهل ساعات والوَحشة كتير .. وجواه حيخرج لنورك ضحك ودموع كتيرة أوي .. قدام عنيك .. وفي حضنك .. وبس ..
إيمان الميهي
No comments:
Post a Comment