عن الجمال

أنا مش جميله

البوست ده استفزني أكتب اللي هقوله دلوقتي
مبنكرش إن الجمال بيلفت نظر أي إنسان ،، و إنه نعمة من ربنا سبحانه و تعالى
فيه ناس تقولهم " الجمال جمال الروح " يقولوا لك " بس ما يمنعش الشكل يكون جميل برضه .. إن الله جميل يحب الجمال.. و النظرة الأولى لك (( و دي مصيبة بس محتاجة لها بوست لوحده ) ) .. الماء و الخضرة و الوجه الحسن ... إلخ "
الناس بتستغرب لما باقولهم إنه الشكل مبيفرقش معايا خالص في أي حد باتعامل معاه !! هو طبعا بيفرق مع أي بنت في الدنيا شكلها و اللي تقول غير كده تبقى كدابة .. و حب التزين ده فطرة ف كل بنت بس المهم تستغلها قدام الشخص المناسب مش ع الفاضي و المليان .. و البنت الذكية اللي بتخلي مكياجها - مثلا - يبرز جمالها اللي ربنا خالقه مش يزيف و يغير شكلها للأسوأ حتى لو بان للأجمل
لكن
ربنا سبحانه و تعالى مبيخلقش حد وحش .. حتى أكثرهن دمامة فيه في شكلها شئ جميل .. لازم ده عدل ربنا
يعني مثلا ممكن تكون سوداء لكن ملامحها جميلة جدااا و أنا شفت بنت كده ..
ثم إن الواحد بيتعود ع الشكل بمرور الوقت و المواقف أيا كان الشكل ده
لو واحدة متجوزة واحد عنيه ملونة و شعره ناعم و طول بعرض ... إلخ
حتحس بشكله بس ف الأول بعد فترة حتتعود عليه .. لو كويس حتشوفه ملاك .. لو وحش ف طباعه هتشوفه عفريت
لو واحدة بقى متجوزة واحد مش حلو خااالص - مثلا - بعد فترة حتتعود على شكله و لو كان جميل من جوه هينطبع ده على كل ملامحه

و اللي بيحب حد بيشوفه أجمل حد في الدنيا كلها

" خدوا عيني شوفوا بيها "

ده غير إنه الجمال أصلا نسبي

لو فيه عيون ملونة و جميلة فعلا من حيث مقاييس الشكل بس تحس إنها صورة .. عيون ميتة .. بالله عليكم يبقى لجمالها قيمة !؟؟

لكن لو فيه عيون تانية فقيرة من حيث مقاييس الجمال و معبرة جداااااااااا .. و الله تبان أجمل عيون في الدنيا

يمكن كلامي يبان نظري - لبعض الناس - لكن أنا مقتنعة جدا بيه مع عدم إغفال قيمة الجمال لكن قيمته الحقيقية